Թուրքիայի խորհրդարանի հայ պատգամավոր Կարո Փայլանը Twitter–ի իր էջում մեկնաբանել է Ահմեդ եւ Մեհմեդ Ալթան եղբայրներին ցմահ ազատազրկման դատապարտումը։

Կարո Փայլանը գրել է. «Գերմանիայի, Ֆրանսիայի, ԱՄՆ–ի անձնագիր չունեցող գերիները Թուրքիայում «բազարի» առարկա չլինելու պատճառով ցմահ ազատազրկում են ստանում»։

Նշենք, որ Կարո Փայլանն իր գրառման տակ նկատի ուներ գերմանական Die Welt–ի թղթակից Դենիզ Յուջելի ազատ արձակումը Անգելա Մերկելի հայտարարությունից հետո եւ հեղաշրջման մասին իմանալու մեղադրանքով ցմահ ազատազրկման դատապարտված Մեհմեդ Եւ Ահմեդ Ալթան եղբայրներին։

Ալթան եղբայրները ցմահ են ազատազրկվել միայն այն բանի համար, որ հեղաշրջումից առաջ իրենց հրապարակումներից մեկում գրել են, որ շուտով Էրդողանը կհեռանա։

Ավելի վաղ, Թուրքիայի Սահմանադրական դատարանը Ահմեդ Ալթանին ազատ արձակման որոշում էր կայացրել, սակայն թուրքական իշխանությունները թույլ չեն տվել իրականացնել Սահմանադրական դատարանի որոշումը։