Հայաստանի եւ ԱՄՆ-ի միջեւ համագործակցության զարգացումը որոշակիորեն կախված է Վաշինգթոն-Անկարա հարաբերություններից: Այսպիսի կարծիք փետրվարի 19-ին՝ լրագրողների հետ հանդիպման ժամանակ հայտնեց ՀՅԴ Բյուրոյի Հայ Դատի եւ քաղաքական հարցերի գրասենյակի պատասխանատու Կիրո Մանոյանը:
Նրա խոսքով, այս փուլում ԱՄՆ-Թուրքիա հարաբերությունները բավականին լարված են, եւ հայկական կողմը լիովին կարող է դա օգտագործել՝ զարգացնելով համագործակցությունը Վաշինգթոնի հետ: «Այս ուղղությամբ մենք աշխատելու տեղ ունենք: Մենք պետք է ավելի ակտիվ լինենք Միացյալ Նահանգների հետ հարաբերությունների հետագա զարգացման առումով: Եվ այս ուղղությամբ արդեն որոշակի տեղաշարժեր կան», - ավելացրեց Մանոյանը:
ՀՅԴ ներկայացուցչի կարծիքով, Հայաստանը պետք է զարգացնի ԱՄՆ-ի հետ հարաբերությունները տնտեսության ոլորտում, որի համար անհրաժեշտ է ակտիվացնել ջանքերը: Միեւնույն ժամանակ, հայկական կողմը պետք է ուշադիր հետեւի Իրանի շուրջ իրավիճակի զարգացումներին, քանի որ դա ուղղակիորեն մեր շահերից է բխում: