Ճապոնիայի խոշորագույն ավտոկոնցեռն Toyota-ն 300 մլրդ իեն (2,8 մլրդ դոլար) կներդնի գիտահետազոտական կենտրոն ստեղծելու համար, որը կզբաղվի էկոլոգիապես մաքուր ավտոմեքենաների հավաքածուի մշակմամբ, հայտնում է Nikkei պարբերականը:
Նշվում է, որ նոր մեքենաներ մշակելիս կենտրոնը ուշադրություն կդարձնի տարբեր երկրների օրենսդրությանը: Գիտահետազոտական կենտրոնը կտեղակայվի Այտի պրեֆեկտուրայում, նրա տարածքում կկառուցվեն նաեւ 11 տարբեր թեստային ուղիներ: Կենտրոնի ընդհանուր մակերեսը կկազմի մոը 650 հա: Սպասվում է, որ այն կսկսի աշխատել արդեն հաջորդ տարի, իսկ ամբողջական հզորությամբ կգործի 2023 թվականին:
Թեստային ուղիների վրա կմոդելավորվեն այն պայմանները, որոնց վարորդները բախվում են տարբեր երկրներում: Դրանցից մեկը կլինի հանրահայտ գերմանական Նյուրբուրգրինգ մայրուղու մասնակի նմանակումը, որտեղ Toyota-ն ծրագրում է ստուգել ղեկային կառավարման կայունությունը, արգելակման համակարգերը եւ արագ ընթացքի պայմաններում ավտոմեքենաների այլ գործառույթները: