ՀՀ գյուղատնտեսության նախարար Իգնատի Առաքելյանն այսօր՝ փետրվարի 22-ին, մեկնել է Ֆրանսիա` Գյուղատնտեսական միջազգային ցուցահանդեսին եւ գյուղատնտեսության նախարարների համաժողովին մասնակցելու նպատակով:
Գյուղնախարարությունից NEWS.am-ին հայտնում են, որ Համաժողովը, որին մասնակցելու են մոտ 20 երկրների գյուղատնտեսության նախարարներ, կկայանա փետրվարի 23-ին «Արժեքների ստեղծում եւ բաշխում գյուղատնտեսական սննդի շղթայում» խորագրի ներքո: Կքննարկվեն ֆերմերների շահույթի ավելացմանը եւ եկամուտների բաշխմանը, սննդամթերքի անվտանգությանն առնչվող հարցեր:
Նույն օրը կկայանա ՀՀ գյուղատնտեսության նախարար Իգնատի Առաքելյանի հանդիպումը Ֆրանսիայի Հանրապետության պարենի եւ գյուղատնտեսության նախարար Ստեֆան Տրավերի հետ:
Նախատեսվում է նաեւ նախարարի հանդիպում Զարգացման ֆրանսիական գործակալության ներկայացուցիչների հետ, որի ընթացքում կքննարկվեն Գործակալության կողմից Հայաստանում իրականացվող ծրագրերը:
Այցի շրջանակում նախարար Իգնատի Առաքելյանը կմասնակցի նաեւ Փարիզում կայանալիք գյուղատնտեսության միջազգային ցուցահանդեսին:
