Թուրքիայի նախկին նախագահ Աբդուլլահ Գյուլը անդրադարձել է Թուրքիայի նախագահական ընտրություններին եւ ԱՄՆ-ի հետ հարաբերություններին։
Թուրքական CNNturk-ի լրագրողի հետ զրույցում Թուրքիայի նախկին նախագահ Աբդուլլահ Գյուլը խուսափել է հստակ պատասխանել նախագահի թեկնածու առաջադրման հավանականության մասին։ Գյուլը պատասխանել է, թե ինքը երբեւէ ոչ ասել է կառաջադրվի, ոչ էլ հակառակը։ Նա նշել է, թե «Բարգավաճում» կուսակցությունից էլ նախագահի թեկնածության առաջարկ չի ստացել։
Գյուլը պնդել է, թե Թուրքիայում վաղաժամ ընտրություններ չեն լինի եւ ամեն ինչ նախատեսվածի պես կլինի 2019 թվականին։
Անդրադառնալով ԱՄՆ-Թուրքիա հարաբերություններին, Աբդուլլահ Գյուլը նշել է, թե ինքը որեւէ կերպ չի հասկանում ԱՄՆ քաղաքականությունը։ «Ես հետեւում եմ ԱՄՆ-Թուրքիա հարաբերությունների պատմությունը, սակայն ներկայիս դրությունը լրիվ անհասկանալի է ինձ համար»,-ասել է Գյուլը։
Նշենք, որ ավելի վաղ «Բարգավաճում» կուսակցության նախագահը հայտարարել էր, թե Աբդուլլահ Գյուլը նախագահի իրենց հավանական թեկնածուներից է։