Ամերիկացի կոլեկցիոներ 87-ամյա Ֆորեսթ Ֆենը իր՝ «Հետապնդման կիրքը» հուշագրության մեջ պատմում է, որ Սանտա ֆե քաղաքից ոչ հեռու, ապառաժոտ լեռներում թաքցրել է 2 մլն դոլար արժողությամբ գանձերով սնդուկ: Նրա խոսքով՝ արդեն 65 հազար մարդ փորձել է գանձը գտնել, իսկ չորսը նույնիսկ զոհվել է, հայտնում է The Washington Post-ը:
Ֆենի խոսքով՝ սնդուկի գանձերի թվում են հնագույն մետաղադրամներ, ոսկու բնակտորներ, XVII դարի մատանի, ադամանդներ, շափյուղաներ, ռուբիններ, զմրուխտներ, չինական նեֆրիտե արձանիկներ, Կոլումբոսի ժամանակների հնդկացիական ապարանջաններ: Վիետնամում պատերազմի ժամանակ Ֆենը տարվել է հնագիտությամբ եւ Սանտա Ֆեում պատկերասրահ է բացել: Իր «Հետապնդման կիրքը» գրքում միլիոնատերը բանաստեղծություններում 9 հուշում է ծածկագրել՝ որոնք բացահայտելով կարելի է իմանալ, թե գանձը որտեղ է գտնվում: Գանձը որոնողները կարծում են , որ այն թաքցված է ինչ-որ տեղ Մոնտանայում, Վայոմինգում, Կոլորադոյում կամ Նյու Մեքսիկոյում:
Փետրվարի 20-ին Kurl8 ալիքը հայտնել էր գանձը որոնողներից մեկի զոհվելու մասին: Իլինոյսի 53-ամյա բնակիչ Ջեֆ Մերֆին ընկել էր 152-մետրանոց ժայռից եւ մահացել: Ոստիկանության տեղեկություններով՝ սա գանձը որոնելու հետեւանքով մահվան չորրորդ դեպքն է: Ֆենի խոսքով՝ գանձն անվտանգ վայրում է, որին կարող է հասնել նունիսկ 80-ամյա ծերունին:
