Իրանը Հայաստանին դիտարկում է որպես պատուհան՝ Եվրասիական տնտեսական միության (ԵԱՏՄ) շուկաներ դուրս գալու համար: Այս մասին փետրվարի 27-ին Երեւանում կայացած հայ-իրանական միջկառավարական հանձնաժողովի 15-րդ նիստի ժամանակ հայտարարել է Իրանի էներգետիկայի նախարար Ռեզա Արդաքանիանը։

Ըստ նրա՝ Հայաստանը կարող է կամուրջ դառնալ 80 միլիոնանոց իրանական շուկայի եւ ԵԱՏՄ-ի 160 միլիոնանոց շուկայի միջեւ: «Իրանի արտաքին քաղաքականությունը հիմնված է ոչ միայն տարածաշրջանի երկրների հետ համագործակցության զարգացման վրա, այլեւ՝ ողջ աշխարհի: Կարծում եմ, որ հայ-իրանական քաղաքական հարաբերությունները կարող են իրենց ներդրումն ունենալ տարածաշրջանի երկրների միջեւ հարաբերությունների բարելավման գործում եւ նպաստել բազմակողմ համագործակցությանը»,- նշել է Իրանի էներգետիկայի նախարարը:

Կարեւոր դեր, շարունակել է նա, կխաղա միջազգային տրանսպորտային միջանցքների, մուլտիմոդալ բեռմափոխադրումների զարգացումը, ինչպես նաեւ՝ «Հյուսիս-Հարավ» ճանապարհային միջանցքի որոշակի հատվածների շինարարության մեջ իրանական կողմի հնարավոր մասնակցությունը: Ըստ Ռեզա Արդաքանիանի՝ ոչ պակաս կարեւոր նշանակություն ունի նաեւ հայ-իրանական սահմանի անցակետի՝ հայկական կողմի նախաձեռնած մոդեռնիզացումը։