Ես որեւէ կուսակցության անդամ չեմ պատրաստվում դառնալ, նույնիսկ՝ Ձերը, պարոն Փաշինյան: Այս մասին, այսօր՝ մարտի 1-ին, ԱԺ-ում իր ելույթում նշեց ՀՀ նախագահի թեկնածու Արմեն Սարգսյանը՝ պատասխանելով հարցին, թե հնարավոր համարում է, որ գլխավորի ՀՀԿ ցուցակը վարչապետ դառնալու համար։
«Եթե ընտրվեմ՝ Սահմանադրությունը կարգելի, եթե չընտրվեմ՝ առավել եւս»,-ասաց նա:
Հարցին, թեե իրեն չի մտահոգո՞ւմ փաստը, որ ինքն, ըստ էության, ոչ թե ընտրվում, այլ նշանակվում է ՀՀ նախագահի պաշտոնում, քանի որ միակ թեկնածուն է, Արմեն Սարգսյանը պատասխանեց. «Սահմանադրությունը ես չեմ գրել, ես միայն քվեարկել եմ: Հարցն ինձ չի ուղղված, ես գործում եմ այսօրվա Սահմանադրության պայմաններում: Եթե ընտրվեմ, կարող ենք զրույց ունենալ, թե ինչ հարցեր են ինձ անհանգստացնում սահմանադրության եւ օրենքների մեջ: Ունեցել ենք 3 սահմանադրություն, եթե լավը չլինի, կունենանք նաեւ 4-րդը»:
Նշենք, որ այսօր ԱԺ-ում սկսվել է ՀՀ 4-րդ նախագահի ընտրության հարցի քննարկումը, իսկ քվեարկությունը տեղի կունենա վաղը: