«Ելք» խմբակցության ղեկավար Նիկոլ Փաշինյանը տպավորվել է ԱԺ պետաիրավական եւ մարդու իրավունքների պաշտպանության հանձնաժողովի նախագահի պաշտոնում Գեւորգ Կոստանյանի ընտրության հարցի քննարկման ժամանակ հնչած գովաբանական ելույթներով:
«Գեւորգ Կոստանյանը, իմաստության ակունքը, մեր իրավաբանության ու իրավունքի արեգակը… ասում եմ՝ Կոստանյանին տեսնեմ, ասեմ՝ այ եղբայր, լսում էի ելույթները ու քո փոխարեն գետինն էի մտնում: Բա նորմալ մարդը ուրիշ մարդու հասցեին էդպիսի գովեստներ կշաղակրատի՞: Էս ի՞նչ է կատարվում: Բա նորմալ մարդը իր հասցեին էդպիսի դիֆերամբներ կընդունի՞: Ու այսօր Սամվել Ֆարմանյանն ու մյուս ՀՀԿ-ականները վերցրեցին ու սկսեցին գովաբանել Արմեն Սարգսյանին: Արեգակ է բացվել մեր երկրի վրա: Բա պատկերացրեք, թե էստեղ նստածները վաղը ինչեր են ասելու Սերժ Սարգսյանի մասին»,-հայտարարեց Փաշինյանը:
Նա հիշեցրեց, որ 2015 թվականին Սերժ Սարգսյանը հայտարարել է, որ չի հավակնելու երբեք վարչապետի պաշտոնին՝ ընթերցելով այդ հայտարարությունը:
«Արդեն մեր երկնակամարում երկու արեգակ կա՝ Գեւորգ Կոստանյանն ու Արմեն Սարգսյանը: Բա որ Սերժ Սարգսյանը մտավ… Ասելու են՝ ո՞նց, հիմա դու ազգին որբ ես թողնելու, գնա՞ս: Բա եթե Սերժ Սարգսյանը հայտարարել է, որ չի առաջադրվելու վարչապետի պաշտոնի համար, բա հիմա անտեր մեր ցեղը կոչելո՞ւ է զուր տեղը»,- իր խոսքն ամփոփեց Փաշինյանը:
