Մոսկվայում կայացած Եվրասիական տնտեսական միության (ԵՏՄ) անդամ պետությունների էներգետիկայի բնագավառի լիազոր մարմինների ղեկավարների խորհրդակցությանը քննարկվել է ԵՏՄ միասնական էլեկտրաէներգետիկական շուկայի մասին համաձայնագիրը: Մարտի 1-ին կայացած հանդիպմանը մասնակցել է նաեւ ՀՀ էներգետիկ ենթակառուցվածքների եւ բնական պաշարների նախարար Աշոտ Մանուկյանը:
Հավաքի մասնակիցները կարծիքներ են փոխանակել համաձայնագրի խնդրահարույց դրույթների շուրջ, հստակեցվել են առանձին պետությունների մոտեցումները: Քննարկված բոլոր հարցերի շուրջ հստակ պայմանավորվածություններ են ձեռք բերվել:
Աշոտ Մանուկյանն նաեւ առանձնազրույցներ է ունեցել ԵՏՄ էներգետիկայի եւ ենթակառուցվածքների գծով Կոլեգիայի անդամ, նախարար Էմիլ Կայկիևի, ՌԴ էներգետիկայի փոխնախարար Վյաչեսլավ Կրավչենկոյի, Ղրղզստանի արդյունաբերության, էներգետիկայի եւ ընդերքօգտագործման պետական կոմիտեի նախագահ Ուլանբեկ Ռիսկուլովի հետ:
Բելառուսի էներգետիկայի փոխնախարար Վադիմ Զակրևսկու հետ առանձնազրույցի ընթացքում էլ քննարկվել են էլեկտրաէներգետիկական եւ գազի միասնական շուկաների ձեւավորման հիմնական խնդիրները, երկու երկրների կառավարությունների մոտեցումներն ու գնագոյացման մեխանիզմները: