Թուրքիան միակ երկիրն է, որտեղ քաղաքացու ինքնությունը ազգային անվտանգության հարց է: Այնուամենայնիվ, ի զարմանս թուրքերի, երեք շաբաթ առաջ տոհմաբանական տվյալների առցանց բազայում բնակչության ռեգիստրի հանկարծակի բացումն այնքան ապշեցուցիչ էր, որ համակարգը մի քանի ժամվա ընթացքում դադարել է գործել: Այս մասին իր հոդվածում գրում է բրիտանացի լրագրող Ռոբերտ Ֆիսկը:
Պարզվել է, որ շատ թուրքեր իրականում հայեր են եղել կամ՝ կիսով չափ հայեր, հույներ եւ հրեաներ: «Հնագույն ուրվականները դուրս են եկել դարավոր գերեզմաններից, որպեսզի հաստատեն իրենց հայկական ներկայությունը թուրքական պատմության մեջ», - գրում է լրագրողը:
Նա ընդգծում է, որ 2007 թվականին սպանված «Ակոս» թերթի խմբագիր Հրանտ Դինքն ասում էր, որ թուրքական կառավարությունը ռեգիստրում գաղտնի կերպով կոդավորել է ազգային փոքրամասնությունների ներկայացուցիչներին: Ֆիսկը նշում է, որ, ըստ հաղորդումների, 48 ժամվա ընթացքում 4 միլիոն թուրք քաղաքացի է մուտք գործել տոհմաբանական ծառի կայք, ինչի պատճառով համակարգում անսարքություն է առաջացել: Երբ այն վերականգնվել է, ըստ նախկին վիճակագիր եւ հայ ժողովրդագիր Ջորջ Աղջայանի, 8 միլիոն թուրք ցանկացել է տեսնել իր տոհմածառը, այսինքն՝ ամբողջ երկրի բնակչության 10 տոկոսը:
«Հնարավոր է, որ 2 միլիոն թուրքերի տատիկները հայ են եղել: Այնուամենայնիվ, նրանք համարում են, որ ցեղասպանություն տեղի չի ունեցել», - գրում է Ֆիսկը:
