«Ծառուկյան» խմբակցության քարտուղար Վահե Էնֆիաջյանը չի կասկածում, որ իրենց թիմը միաձայն կողմ է քվեարկել ՀՀԿ–ից նախագահի թեկնածու Արմեն Սարգսյանին։ NEWS.am–ի հետ զրույցում պատգամավորն ասաց՝ նշանակություն չունի՝ ով ինչ կարծիքի ունի Արմեն Սարգսյանի մասին, սակայն ընտրությունը եղել է խմբակցության որոշման համաձայն։
Նշենք, որ Արմեն Սարգսյանն այսօր Ազգային ժողովի կողմից ընտրվեց 4–րդ նախագահ 90 կողմ եւ 10 դեմ ձայների հարաբերակցությամբ, մինչդեռ ՀՀԿ, ՀՅԴ, «Ծառուկյան» խմբակցությունները հայտարարել են, որ միաձայն կողմ են քվեարկելու Արմեն Սարգսյանին։ Ընտրությանը մասնակցել է 101 պատգամավոր։ Մեկ քվեաթերթիկն անվավեր է համարվել։ Թե ինչու է անվավեր համարվել, Հաշվիչ հանձնաժողովի անդամները խիստ գաղտնի են պահում։ «Ելք» դաշինքը հայտարարել էր, որ դեմ է քվեարկելու, իսկ ընտրությանը մասնակցել է 7 պատգամավոր։ Ստացվում է ՝ 3 դեմ–ը մյուս խմբակցություններից են, սակայն այս խմբակցություններից վստահեցնում են, թե իրենց թիմից չէ։ ՀՀԿ խմբակցության ղեկավար Վահրամ Բաղդասարյանը մեզ հետ զրույցում հայտարարեց, թե կարող է վստահաբար ասել, որ Արմեն Սարգսյանին դեմ քվեարկած երեք պատգամավորները ՀՀԿ–ՀՅԴ կոալիցիայի 65 պատգավարների թվում չեն։ Նույն պնդումն է անում «Ծառուկյան» խմբակցության քարտուղար Վահե Էնֆիաջյանը։
«Վստահաբար ասում եմ՝ «Ծառուկյան» խմբակցության ներկայացուցիչներով ունեինք քաղաքական որոշում եւ մեր որոշումը միանական իրականացրել ենք, եւ որեւէ խնդիր մեր խմբակցության մասով չի կարող լինել։ Ես վստահ եմ՝ մեր թիմի յուրաքանչյուր անդամի մասով, որ միաձայն մեր որոշումը կատարել ենք։ Միաձայն կողմ ենք քվեարկել»։
Վահե Էնֆիաջյանը պնդեց, թե նշանակություն չունի՝ ով ինչ կարծիք է հայտնել Արմեն Սարգսյանի մասին, բայց վստահ է, որ ընտրությունը նրա օգտին է եղել, իսկ թե ինչու Արմեն Սարգսյանի ծրագրերին հավանություն տված Գագիկ Ծառուկյանը չի եկել, խուսափեց որեւէ խոսք ասել։
Նշենք, որ «Ելք»–ից էլ քվեարկությանը չեն մասնակցել Սասուն Միքայելյանը եւ Էդմոն Մարուքյանը։
