Գյումրիում շենքի փլուզման հետեւանքով դրսում մնացած 6 ընտանիքն առաջիկա օրերին այլ շենք կտեղափոխվեն:
NEWS.am-ի հետ զրույցում Գյումրու քաղաքապետարանի բնակտնտեսության եւ համատիրությունների համակարգման բաժնի պետ Վարդգես Սամսոնյանը նշեց, որ փլուզումից հետո այդ ընտանիքները տեղավորվել են ժամանակավոր կացարաններում:
«Համայնքի ենթակայության տակ գտնվող մի շենք կա, որտեղ բնակարանները վերանորոգում ենք, որ տուժած բնակիչներին տեղափոխենք այնտեղ: Կարծում եմ՝ մոտ օրերս նրանք արդեն կտեղափոխվեն այնտեղ մշտական բնակության»,- ասաց քաղաքապետարանի պաշտոնյան:
Փլուզված շենքը, ըստ Սամսոնյանի, առաջիկայում կապամոնտաժվի, ինչպես որ եղել է սեփականատերերի հետ պայմանավորվածությունը: Հիշեցնենք, որ քաղաքապետարանի որոշմամբ, շենքը պետք է քանդվեր, քանի որ վթարայնություն է ունեցել, սակայն, սեփականատերերը չէին շտապում կատարել որոշումը: Փլուզումից հետո սեփականատերերը «համոզվել են»՝շենքը պետք է քանդել:
Ավելի վաղ NEWS.am-ը հայտնել էր, որ 2018թ. փետրվարի 23-ին ժամը 03:30-ին ահազանգ էր ստացվել, որ Շիրակի մարզի Գյումրի քաղաքի Գ.Նժդեհի փողոցի թիվ 7 շենքի 4-րդ հարկից տեղի է ունեցել փլուզում: Պարզվել է, որ փլուզվել է թիվ 7 կիսաքանդ շենքի 4-րդ եւ 3-րդ հարկերի ծածկի պանելային հատվածը (մոտ 30 քմ): Փրկարարները տարհանել են 11 բնակիչ (2 երեխա):