Հնդկական Tata ընկերությունը Ժնեւի ավտոսրահում ներկայացրել է E-Vision կոնցեպտուալ սեդանը, հաղորդում է Autonews-ը:
Հետագայում այն սերիական տարբերակ կունենա: Մեքենան վաճառքում կհայտնվի մի քանի տարի անց: Նախատիպը հագեցած է էլեկտրական ուժային սարքավորմամբ:
Սեդանը մինչեւ 100 կմ/ժ արագությունը զարգացնում է 7 վայրկյանում, մեքենայի առավելագույն արագությունը 200 կմ/ժ է: Նորույթի տեխնիկական այլ մանրամասներ առայժմ հայտնի չեն: Ոչ պաշտոնական տվյալներով՝ մեկ լիցքավորմամբ մեքենան կարող է 300-400 կմ անցնել:
E-Vision-ը ֆուտուրիստական դիզայն ունի, որը Impact 2.0 անվանումն է ստացել: Ավելի վաղ Tata Motors-ը հայտարարել էր, որ անցնում է Impact 2.0 նոր դիզայնի: Այս քայլը պայմանավորված է Tata-ի արտադրանքի գնորդների նոր պահանջները բավարարելու ցանկությամբ: Ընկերության գլխավոր դիզայներ Պրատապ Բոզեի խոսքով՝ մարդու մոտ մեքենայից առաջին տպավորությունը ձեւավորվում է 20 վայրկյանի ընթացքում: Impact-ը պետք է Tata Motors-ի արտադրանքը հիշվող եւ գրավիչ դարձնի:
