Այժմ մենք շատ կարեւոր փուլում ենք գտնվում, քանի որ մոտենում ենք Հայաստանի եւ ԵՄ-ի միջեւ անցյալ տարվա նոյեմբերին ստորագրված համաձայնագրի վավերացմանը: Այս մասին Բրյուսելում հայտարարել է Հայաստանի փոխարտգործնախարար Կարեն Նազարյանը՝ ելույթ ունենալով Արեւելյան գործընկերության նոր ճարտարապետության գործարկման վերաբերյալ քննարկմանը: Ըստ նրա՝ խոսելով Արեւելյան գործընկերության ապագայի մասին, կարեւոր է չմոռանալ դրա հիմնական գաղափարի մասին, եւ դա ընդհանուր արժեքների համակարգն է, որը կիսում ենք մենք բոլորս:
Նազարյանը նշել է, որ ԵՄ-ն ի սկզբանե ծրագրի միակ «սեփականատերն» էր, քանի որ ամեն ինչ մշակվել եւ նախաձեռնել էր Բրյուսելը, եւ դա բնական էր: «Սակայն տարիներ են անցել, եւ որոշակի արդյունքներ են գրանցվել, եւ մենք եւս էլ ավելի հավակնոտ ենք դարձել: Մենք ցույց տվեցինք, որ ոչ միայն ԵՄ-ն է շահագրգռված կայունության եւ վստահության ամրապնդման հարցում: Կարծիք կա, որ Արեւելյան գործընկերության նախագիծը դադարում է լինել բացառապես ԵՄ-ինը, եւ այն գործընկերների համատեղ սեփականություն է»,- ասել է նա:
Նազարյանը նշել է, որ տարբերակման սկզբունքն Արեւելյան գործընկերության առանցքային տարրն է, եւ Հայաստանի հետ ստորագրված նոր համաձայնագիրն այս սկզբունքի գործնական արտահայտումն է: «Արեւելյան գործընկերությունը կայանում է ոչ թե գործընկերներ ընտրելու, այլ ընդհանուր արժեքների հիման վրա աշխատելու ցանկության մեջ», - ավելացրել է նա: