«Ելք» դաշինքն առաջարկում է Հայաստանի տարածքում կրիպտոարժույթի մայնինգի կարգավորումը սկսել «Տեղեկատվական տեխնոլոգիաների զարգացման մասին» օրինագծի ընդունման ճանապարհով: Այս մասին մարտի 13-ին լրագրողների հետ զրույցում ասաց ընդդիմադիր «Ելք» դաշինքի խմբակցության պատգամավոր Էդմոն Մարուքյանը:
Նրա խոսքով՝ առաջարկվում է սկսել կրիպտոարժույթի մայնինգ եւ 2023 թվականի դեկտեմբերի 31-ին օրենքի ուժի մեջ մտնելու պահից այս ոլորտը հարկերից ազատել: Օրինագծով նաեւ առաջարկվում է, որպեսզի կրիպտոարժույթի մայնինգով զբաղվել ցանկացող անձինք ազատվեն տվյալ կարգի գործունեություն ծավալելու համար որեւէ թույլտվություն ստանալու ընթացակարգից: Դրանից զատ, նրանցից նաեւ չի պահանջվելու լիցենզիայի առկայություն, ինչը թույլ կտա տվյալ տեսակի գործունեությամբ ավելի ազատ ու անկաշկանդ զբաղվել:
«Այս օրինագծի ընդունումը կարեւոր է եւ պայմանավորված է ժամանակակից աշխարհում առաջընթացի ճանապարհով ընթանալու անհրաժեշտությամբ՝ ժամանակի հետ համընթաց քայլելով»,- պարզաբանեց Մարուքյանը: Ըստ որում՝ նա վստահություն հայտնեց, որ այս օրինագծի ընդունման դեպքում երկրի յուրաքանչյուր քաղաքացի կկարողանա հավասարապես մայնինգով զբաղվել եւ դրանով իսկ փող վաստակել, ինչն իր հերթին կբերի ընդհանրապես բնակչության զբաղվածության աճին: Դրանից զատ, ինչպես կարծում է «Ելք» դաշինքի պատգամավորը, դրա շնորհիվ բարձր տեխնոլոգիաների ոլորտ լրացուցիչ ներդրումներ կներգրավվեն, այդ թվում՝ նաեւ արտասահմանյան:
