Տավուշի մարզում 2017թ.-ի սեպտեմբերի 18-ին տեղի ունեցած ողբերգական վթարի հետեւանքով մահացածի եղբայրը դատապարտվեց 1 տարվա պայմանական ազատազրկման:
Ըստ մեղադրանքի՝ 27-ամյա Ազատ Բ.-ն, չունենալով վարորդական իրավունքի վկայական, եղբոր հետ փայտանյութով բեռնված ավտոմեքենայով Դիլիջան ազգային պարկի Հաղարծին տեղամասի 1-ին պահաբաժնի հանդամասից կտրուկ իջնելու ընթացքում կորցրել է ավտոմեքենայի կառավարումը: Ազատը մեքենան արգելակելու նպատակով ղեկը թեքել է աջ, դուրս եկել երթեւեկելի մասից, ինքն իրեն զրկել վթարը կանխելու տեխնիկական հնարավորությունից եւ գլորվել հարակից ձորակը: Վթարի հետեւանքով ուղեւորը՝ Արտակ Բ.-ն, ստացած մարմնական վնասվածքներից տեղում մահացել է:
Տավուշի մարզի ընդհանուր իրավասության դատարանը 27-ամյա երիտասարդին մեղավոր է ճանաչել Քրեական օրենսգրքի 242-րդ հոդվածի 2-րդ մասով եւ նրան դատապարտել ազատազրկման 1 տարի ժամկետով` ավտոտրանսպորտի միջոցներ վարելու իրավունքից զրկելով` 2 տարի ժամկետով: Դատարանը որոշում է կայացրել կիրառել Քրեական օրենսգրքի 70-րդ հոդվածն ու նշանակված պատիժը պայմանականորեն չկիրառել` նշանակելով 1 տարի փորձաշրջան: