Քանի որ Սերժ Սարգսյանը իշխանության գալու առաջին օրվանից մինչ օրս օրինական ռեսուրս չի ունեցել, ապա նա իր կառավարման փիլիսոփայության հիմքում դրել է սուտը, կեղծիքը եւ ամեն գնով վերարտադրվելը: Այս մասին, այսօր՝ մարտի 16-ին, «Հանուն Հայաստան պետության» ճակատի իշխանափոխության բանաձեւն ու առաջիկա քայլերը» թեմայով քննարկման ժամանակ նշել է «Հանուն Հայաստան պետության» ճակատի համակարգող խմբի անդամ Սուսաննա Մուրադյանը:
«Մենք ամեն ինչ անելու ենք, որ խաղաղ իշխանափոխություն լինի, այսինքն՝ ժողովրդի այնպիսի ըմբոստության հնարավորություն ստեղծվի, որ ճնշման տակ այսօրվա ապօրինի իշխանությունը հասկանա, որ պետք է թողնի հեռանա»,- ասաց նա:
Դիտարկմանը, թե միայն անձերի փոփոխությամբ երկրում ոչինչ չի փոխվի, Սուսաննա Մուրադյանը նշեց, որ Սերժ Սարգսյանն իր շուրջը ստեղծել է մի համակարգ, որտեղ քավոր-սանիկ-խմամի համակարգի բոլոր թելերը իր ձեռքում են, հետեւաբար իր չլինելը քանդելու է համակարգը եւ օգնելու է համակարգի փլուզմանը:
«Մեր երկրի վիճակը ավելի վատ չի եղել, կուզի Շարմազանովը սերենադներ երգի Սերժ Սարգսյանի համար, թող Աշոտյանն էլ միանա էդ երգերին ու մնացած պնակալեզները նույնպես թող ասեն, որ նա անփոխարինելի է, այլուն գործիչ է… Այո՛, նա իսկապես անփոխարինելի է, որովհետեւ որեւէ մեկի օրոք 380 հազար մարդ չի լքել երկիրը: Չկա այդպիսի երկիր, որի ղեկավարը ճիշտ ու նորմալ է կառավարել եւ այդ երկրում 1 մլն աղքատ կա, 40 տոկոս քաղցած երեխա կա: Այս ցուցանիշներ ունեցող մարդուն որակում են անփոխարինելի բանակցող: Թե բանակցությունների, թե տնտեսության, թե արտաքին ու ներքին քաղաքականության ոլորտներում միայն տապալումներ ունենք»,- նշեց «Հանուն Հայաստան պետության» ճակատի համակարգող խմբի անդամը՝ հավելելով, որ հիմա Սերժ Սարգսյանն իբր կողք է քաշվել ու իրենց սազանդարները խնդրում են, որ նրանից բացի այլ անձի չեն տեսնում:
Նշենք, որ այսօր՝ մարտի 16-ին, Ազատության հրապարակում իր երկրորդ հանրահավաքն է կազմակերպելու «Հանուն Հայաստան պետության» ճակատը: