Լեռնային Ղարաբաղի շփման գծում լարված իրավիճակի պատճառն Ադրբեջանի ապակառուցողական դիրքորոշումն է, որը մշտապես խախտում է հրադադարի ռեժիմը: Այս մասին մարտի 19-ին՝ Հայաստան–ԱՄՆ բարեկամական խմբի ԱՄՆ կատարած այցին նվիրված մամուլի ասուլիսի ժամանակ հայտարարել է ԱԺ փոխխոսնակ, իշխող հանրապետական կուսակցության պատգամավոր Արփինե Հովհաննիսյանը։ 

Նրա խոսքով, անվտանգության պահպանման հարցում կարեւոր դեր ունի Մինսկում, Վիեննայում եւ Սանկտ–Պետերբուրգում ձեռք բերված համաձայնությունների պահպանումը։ 
«Հայկական կողմը մշտապես հանդես է գալիս հրադադարի ռեժիմի պահպանման օգտին, սակայն, դա, կարծես թե, չի բխում Բաքվի շահերից»,-ասել է Հովհաննիսյանը:

Խոսելով հայ–թուրքական արձանագրությունների չեղարկման մասին՝ խորհրդարանի փոխխոսնակը նշել է, որ հայկական կողմն արել է ամեն հնարավորն այդ արձանագրությունների վավերացման համար, սակայն Անկարան իր պահվածքով տապալել է բոլոր ջանքները։