Երեւանի ավագանու մարտի 19-ին գումարած հերթական նիստում, որը վարել է Երեւանի քաղաքապետ Տարոն Մարգարյանը, քննարկվել են Երեւան քաղաքի 2017թ. բյուջեի կատարման եւ Երեւանի զարգացման 2017թ. ծրագրի իրականացման հաշվետվությունները։
Հարցը ներկայացնող Երեւանի քաղաքապետի տեղակալ Վահե Նիկոյանը նշել է, որ 2017թ. առանձնացել է բարձր կատարողական ցուցանիշներով թե եկամուտների գերակատարման եւ թե ծախսերի տնտեսման առումով, ինչի շնորհիվ 2017թ. բյուջեով նախատեսված 910 մլն դրամ պակասուրդի՝ դեֆիցիտի դիմաց բյուջեն փաստացի կատարվել է 1,489 մլն դրամ պրոֆիցիտով կամ հավելուրդով։
Երեւանի 2017թ. բյուջեով ընդամենը եկամուտների փաստացի կատարողականը կազմել է 100,3 տոկոս, ընդ որում, սեփական եկամուտների փաստացի կատարողականը կազմել է 101%, որն ավելի է նախորդ տարվա համապատասխան ցուցանիշից 595,3 մլն դրամով։ Իրականացված ծախսերի կատարողականը կազմել է 97%, որն էլ պայմանավորված է գնումների գործընթացում առաջացած խնայողություններով:
Ավագանու անդամները քվեարկությամբ հաստատել են Երեւանի 2017թ. բյուջեի կատարման հաշվետվությունը:
Փոխքաղաքապետ Վահե Նիկոյանը ներկայացրել է նաեւ Երեւանի զարգացման 2017թ. ծրագրի իրականացման հաշվետվությունը՝ նշելով, որ ընդհանուր առմամբ 2017թ. իրականացված ծրագրերը, աշխատանքներն ու միջոցառումներն միտված են եղել Երեւանի զարգացման 2014-2017թթ. քառամյա ծրագրով նախանշված հիմնախնդիրների լուծմանը՝ հաշվի առնելով գերակա ուղղությունները։
Ավագանու որոշմամբ Երեւանի զարգացման 2017թ. ծրագրի իրականացման հաշվետվությունն ընդունվել է ի գիտություն:
