Ռուսաստանի նախագահի պաշտոնում Վլադիմիր Պուտինի վերընտրությունը Հայաստանի շահերից է բխում եւ դրական կազդի հայ-ռուսական հարաբերությունների վրա: Մարտի 20-ին լրագրողների հետ հանդիպման ժամանակ այսպիսի կարծիք հայտնեց «Նորավանք» գիտակրթական կենտրոնի տնօրեն Գագիկ Հարությունյանը:
Նա համոզմունք հայտնեց, որ հայ-ռուսական հարաբերությունները կշարունակեն զարգանալ ռազմավարական գործընկերության ոգով, եւ Պուտինի հավատարմությունը երկրի հարավային սահմանների ամրապնդման գործում դրական կազդի նաեւ Հայաստանի վրա, քանի որ Գյումրիում տեղակայված 102-րդ ռազմակայանը, որը մտնում է Հարավային ռազմական օկրուգի մեջ, կզինվի գերժամանակակից եւ բարձրճշգրիտ սպառազինությամբ: «Հարավային ռազմական օկրուգի վերազինումը վկայում է Ռուսաստանի համար այս տարածաշրջանի կարեւորության մասին, եւ նրա ներկայությունն ինչ-որ չափով զսպում է տարածաշրջանում այլ ուժերի ախորժակը»,- շեշտեց փորձագետը:
Նրա կարծիքով՝ ռուսական հանրության շրջանում նախագահական ընտրություններից սպասումները բավականին մեծ են: «Սակայն անհրաժեշտ է հասկանալ, որ ռուսները յուրահատուկ ժողովուրդ են. նրանց վրա ճնշումը որքան մեծ է, այնքան դա հակադարձ արդյունք ունի: Հենց այս պատճառով Մեծ Բրիտանիայի վարչապետ Թերեզա Մեյի հայտարարությունները Պուտինի ընտրազանգվածը միայն մեծացրել են»,- նշեց Հարությունյանը: Այդուհանդերձ, շարունակեց նա, Պուտինի համար ինչ-որ արտակարգ բան չէ ընտրողների 70 տոկոսից ավելիի աջակցությունը՝ նրա վարկանիշը բարձր է ոչ միայն երկրի ներսում, այլեւ արտասահմանում:
Հիշեցնենք, որ Ռուսաստանում նախագահական ընտրությունները տեղի են ունեցել մարտի 18-ին: Պաշտոնական տվյալներով՝ գործող նախագահ Վլադիմիր Պուտինի օգտին է քվեարկել ընտրողների ավելի քան 70 տոկոսը: