«Արժանապատիվ ազատամարտիկ» ՀԿ նախագահ, պահեստազորի գնդապետ Վոլոդյա Ավետիսյանն ու իր ընկերները, չնայած իրենց նկատմամբ ճնշումներին, շարունակում են նստացույցը Ազատության հրապարակում՝ իշխանությունների հեռանալու պահանջով:
«Այս պահին, չնայած, որ նստացույցի մասնակիցների նկատմամբ ճնշումներ են կիրառվում, մենք շարունակում ենք նստացույցը եւ շարունակելու ենք: Նշենք, որ մեր աջակիցներից ապարանցի 18-ամյա Արթուր Մարգարյանը այդքան ճնշումներից հետո վերադարձել է Ազատության հրապարակ եւ շարունակում է նստացույցը: Նրան նույնիսկ վախեցրել են՝ ասելով, որ տղա ջան, չես վախենում, վաղը մյուս օրը բանակ ես գնալու»,- ասաց Վոլոդյա Ավետիսյանը՝ նշելով, որ ոստիկանները ճշտում են նստացույցի մասնակիցների անուն, ազգանունները եւ բնակության հասցեները:
Վոլոդյա Ավետիսյանը կոչ արեց ՄԻՊ-ին ուշադրություն դարձնել իր հայտարարությանը:
Վոլոդյա Ավետիսյանը նշեց, որ այս պահին 15-20 հոգի է մասնակցում նստացույցին, սակայն շատ քաղաքացիներ են իրենց մոտենում, զրուցում, հայտնում իրենց աջակցությունը:
Վոլոդյա Ավետիսյանը հավելեց, որ ամեն ինչ նորմալ հունով ընթանալու դեպքում նստացույցը կշարունակվի մինչեւ մարտի 30-ը:
Նստացույցի մասնակիցները պարզել են պաստառներ, որոնց վրա գրված է. «Թույլ չենք տա Սերժ Սարգսյանի վարչապետացումը», «Հայաստանն առանց քաղբանտարկյալների»: Պաստառներից մեկի վրա էլ գրված են «Սեֆիլյանի եւ մյուսների» գործով ամբաստանյալների անուններն ու դատարանի կողմից տրված պատժի չափը:
Նշենք, որ մարտի 20-ին «Հիմնադիր խորհրդարանի» առաջնորդ Ժիրայր Սեֆիլյանը դատապարտվեց 10 տարի 5 ամսվա ազատազրկման: Գեւորգ Սաֆարյանը դատապարտվեց 4 տարվա ազատազրկման, դրան գումարվեց առաջին դատավճռի 2 տարի ժամկետը եւ վերջնական պատիժ սահմանվեց 5 տարի 6 ամիս ազատազրկում: Գործով անցնող Ներսես Պողոսյանը դատապարտվեց 3 տարի 6 ամիս ժամկետով ազատազրկման, Գալուստ Գրիգորյանը՝ 3 տարի, Հրայր Թոփչյանը՝ 3 տարի, Սասունիկ Կիրակոսյանը՝ 3 տարի 6 ամիս, Հովհաննես Պետրոսյանը՝ 2 տարի ժամկետով ազատազրկման:
Հիշեցնենք, որ Վոլոդյա Ավետիսյանը 2013թ. սեպեմբերին կալանավորվել եւ 2014-ի ամռանը 6 տարվա ազատազարկման է դատապարտվել, իսկ 2017-ի մայիսին ազատ է արձակվել համաներման արդյունքում: Նա դատապարտվել է խարդախության համար:
Վոլոդյա Ավետիսյանն արցախյան ազատամարտի մասնակից է, եղել է Լեոնիդ Ազգալդյանի աջ ձեռքը:
