SRI International ընկերությունը, որը հայտնի է բջջային Siri օգնականի ստեղծումով, ռոբոտ է պատրաստում, որը կարող է օգտագործվել որպես սակրավոր կամ վիրաբույժ, հաղորդում է Kommersant.ru- ն` վկայակոչելով CNBC-ին: Ռոբոտը, որը կոչվում է Taurus, կվերահսկվի օպերատորի օգնությամբ՝ վիրտուալ իրականության (VR) ակնոցի միջոցով:
Ըստ ստեղծողների՝ ռոբոտը կարող է իրականացնել բազմաթիվ տարբեր խնդիրներ, սակայն առաջին փուլում այն կենտրոնացած կլինի երկուսի վրա` հեռակա կարգով ռումբի վնասազերծման եւ վիրահատությունների կատարման վրա: Այս երկու խնդիրները նա կարող է համատեղել մարտական պայմաններում, որտեղ միաժամանակ կարող է կատարել սակրավորի եւ վիրաբույժի գործառույթներ: Միեւնույն ժամանակ, ռոբոտի ստեղծողները շեշտում են, որ այն չի կարող փոխարինել իրական բժշկին, բայց նա կարող է օգնել նրան, առաջին հերթին, ավելի բարձր որակավորում ունեցող օպերատորների շնորհիվ, որոնք կմիանան ռոբոտին, առանց իրենց բժշկական հաստատություններից հեռանալու: Հետագայում գիտնականները հուսով են, որ ռոբոտը կարող է օգտագործվել տիեզերագնացների կողմից, օրինակ` Մարսի առաքելության ընթացքում:
Ինչ վերաբերում է ռումբերի վնասազերծմանը, ապա ռոբոտն արդեն հիմա կարող է սակրավորի գործառույթներ կատարել: Այն կշռում է 6 կիլոգրամ եւ կարող է օգտագործվել ավտոմեքենաներում եւ բեռնատարներում ռումբերի չեզոքացման համար: