Հայաստանի բնակչությունն ատելություն ունի իշխանությունների նկատմամբ, սակայն անտարբեր է՝ կընտրվի Սերժ Սարգսյանը, թե ոչ։ Այսօր՝ մարտի 24-ին լրագրողների հետ զրույցում նման կարծիք է հայտնել հոգեբան Սամվել Խուդոյանը։
Նրա խոսքով, հանրության մեծ մասին հետաքրքրում է՝ կպահի արդյոք Սերժ Սարգսյանը չառաջադրվելու իր խոստումը, թե ոչ։ «Հայկական քաղաքական դաշտում չկա, պարզապես չեն մնացել Սերժ Սարգսյանին իրական ընդդիմադիրներ։ Նրանց պարզապես խեղդել են»,- հստակեցրել է Խուդոյանը՝ հավելելով, որ, թերեւս, շատերը դեմ չեն լինի Սերժ Սարգսյանի վերընտրմանը։
Ըստ հոգեբանի, իրավիճակը Հայաստանում նույնն է, ինչ Ռուսաստանում։ Պուտինն էլ իրական մրցակիցներ եւ ընդդիմություն չուներ, իսկ մյուս թեկնածությունները ֆոնի դեր էին կատարում։
Ըստ Խուդոյանի, եթե Սերժ Սարգսյանը որոշի հեռանալ, իշխանությունը կկանգնի իր դիրքն ու ազդեցություն կորցնելու վտանգի առաջ։
Հիշեցնենք, որ, 2015 թվականի Սահմանադրության բարեփոխումների համաձայն, Հայաստանը 2018 թվականի ապրիլի 9-ին վերջապես կանցնի խորհրդարանական կառավարման համակարգին, որի դեպքում իշխանությունը կկենտրոնանա խորհրդարանի կողմից նշանակված վարչապետի ձեռքում:
