Հայ-թուրքական արձանագրությունները ձախողվել են Թուրքիայի նախագահ Ռեջեփ Թայիփ Էրդողանի ազգայնական դիրքորոշման պատճառով: Այս մասին մարտի 26-ին ՀՀ ԱԺ-ում լրագրողների հետ զրույցում ասաց ՌԴ Պետդումայի ԱՊՀ գործերով, եվրասիական ինտեգրման եւ հայրենակիցների հետ կապերի կոմիտեի նախագահի տեղակալ Կոնստանտին Զատուլինը:
Ռուս պատգամավորը Բաքվի՝ Ղարաբաղի եւ այս հարցում կոշտ դիրքորոշումն արձանագրությունների ձախողման պատճառ չի համարում: Ըստ Զատուլինի՝ ամբողջ խնդիրը նրանում է, որ Թուրքիայի նախագահն «իր ճանապարհն է ընտրել»: «Նա ցանկանում է մահմեդական պետությունների ղեկավար լինել եւ այլն եւ այլն, թե՞ եվրոպական հանրության օրինապահ անդամ: Ակնհայտ է, որ նա ընտրել է, այսպես ասած, ավելի ազգայնական ուղին, եւ դա ակնհայտ է», - ասաց Զատուլինը:
Հիշեցնենք, որ այս տարվա մարտի 1-ին Հայաստանի նախագահ Սերժ Սարգսյանը չեղարկել էր 2009-ին ստորագրված հայ-թուրքական արձանագրությունները: