«Ալեքս Տեքստիլ» ՍՊԸ-ն, որը պաշտոնապես պատկանում է Հայաստանի Հանրապետական կուսակցության պատգամավոր, օլիգարխ Սամվել Ալեքսանյանի դստերը՝ Աստղիկ Ալեքսանյանին, ՀՀ կառավարությունից մաքսային արտոնություն է ստացել: Համապատասխան որոշումը կայացվել է ապրիլի 5-ի կառավարության նիստին: Նախագիծը ներկայացրել է տնտեսական զարգացման եւ ներդրումների նախարար Սուրեն Կարայանը:
«Ալեքս Տեքստիլ» տեքստիլ ընկերությունը հայտ էր ներկայացրել մոտ 1.5 մլն դոլար կամ 750.3 մլն դրամի հումքի եւ նյութերի ներկրման մաքսատուրքից ազատման համար: Խոսքը Թուրքիայից եւ Ուզբեկստանից ներկրվող ապրանքների մասին է, մասնավորապես՝ գործվածքների, թելերի, կոճակների, կեռերի:
Հիշեցնենք, որ անցած տարվա վերջում ՀՀ կառավարությունը հաստատել էր Շիրակի մարզի Արթիկ քաղաքի թիվ 7 դպրոցը «Ալեքս Տեքստիլ» ընկերությանը 20 տարով անհատույց օգտագործման համար փոխանցման մասին որոշումը, որտեղ պետք է տեքստիլ արտադրություն սկսվի: Հայ-չեխական կապիտալի հաշվին բացված նոր արտադրամասը նախատեսվում է գործարկել մինչեւ աշուն:
