Հայաստանի եւ ԵՄ-ի միջեւ ստորագրված համապարփակ համագործակցության մասին համաձայնագիրը «հաջողված պատմության» օրինակ է: Այս մասին ապրիլի 9-ին արտաքին հարաբերությունների եւ եվրոպական ինտեգրման մշտական խորհրդարանական հանձնաժողովների համատեղ նիստին հայտարարել է Հայաստանի իշխող Հանրապետական կուսակցության փոխնախագահ, Ազգային ժողովի արտաքին հարաբերությունների մշտական հանձնաժողովի ղեկավար Արմեն Աշոտյանը:
Ընդ որում, ըստ նրա, Հայաստանը եվրասիական տարածքում առաջին երկիրն է, որը ցույց է տվել միանգամայն տարբեր ինտեգրացիոն գործընթացների համատեղման հնարավորությունը, հատկապես եթե դրա համար կա համապատասխան քաղաքական կամք:
«Մեզ հարկավոր է համապատասխան մտածելակերպի մշակույթ ստեղծել, օրինակ, այս համաձայնագրով ոչ միայն մենք պետք է կատարենք մեր ստանձնած պարտավորությունները»,- ասաց Աշոտյանը՝ հավելելով, որ եվրոպական կողմը եւս պետք է կատարի իր պարտավորությունները: Միեւնույն ժամանակ ՀՀԿ փոխնախագահը կարեւորել է խորհրդարանի դերն այդ համաձայնագրի ստորագրման գործում: «ԱԺ-ում չկա որեւէ հանձնաժողով, որը չի աշխատելու այդ համաձայնագրի հետ դրա վավերացումից հետո»,- ասաց Աշոտյանը:
Հարկ է նշել, որ Եվրոպական ինտեգրման մշտական հանձնաժողովը դրական եզրակացություն է տվել Հայաստանի եւ ԵՄ միջեւ համապարփակ համագործակցության մասին համաձայնագրի վավերացմանը: