Հայաստանում քաղաքական գործընթացները անմիջականորեն ազդում են փոքր եւ միջին բիզնեսի զարգացման վրա, իսկ դրանց թուլությունն ու անկայունությունը թույլ չեն տալիս երկրում անկախ, թափանցիկ եւ արդար ընտրություններ անցկացնել: Նման կարծիք ապրիլի 10-ին լրագրողների հետ հանդիպման ժամանակ հայտնեց Հայրենական ապրանք արտադրողների միության նախագահ Վազգեն Սաֆարյանը:
Նրա խոսքով՝ փոքր եւ միջին բիզնեսի հաշվին բնակչության զբաղվածության եւ ինազբաղվածության ապահովումը քաղաքական ենթատեքստ ունի, քանի որ զարգացած լինելու դեպքում, դրանք ստիպված չեն լինի ընտրությունների ժամանակ նպաստել այս կամ այն քաղաքական ուժին կամ նրանց պատվերով մասնակցել ընտրություններին:
«Ինչու են Եվրոպայում ընտրությունները անկախ եւ անկանխատեսելի: Քանի որ միջին դասը տնտեսապես անկախ է եւ քաղաքական կուսակցությունները, որոնց նրանք համակրում են, կոչված են նրանց շահերին ծառայել», - նշեց նա:
Նրա խոսքով՝ փոքր եւ միջին բիզնեսը յուրաքանչյուր տնտեսության ինդիկատորն է, օրինակ Եվրոպայում միջինում հարկային մուտքերում դրանց մասնաբաժինը 50 տոկոսից ավելին է, ՌԴ-ում՝ 20, իսկ Հայաստանում ընդամենը՝ 6 տոսկոս:
Արդարության համար նա հավելեց, որ մի քանի տարի առաջ փոքր եւ միջին բիզնեսի մասնաբաժինը հակերում ընդամենը 3 տոկոս էր, այսինքն` որոշակի աճ կա: Սակայն, միեւնույն ժամանակ, այդ ձեռնարկությունների քանակը տարիների ընթացքում մի քանի անգամ նվազել է, հասնելով 70 հազարի`2017-ի տվյալների համաձայն: Միայն անցյալ տարի 465 տնտեսվարող սուբյեկտներ փակվեցին:
«Այս 70 հազար ձեռնարկությունները բնականաբար ակտիվ գործուենություն էին վարում, բայց խնդիրն այն է, որ նրանցից շատերը՝ 60 տոկոսն, առեւտրի ոլորտում է աշխատում եւ այստեղ, ինչպես գիտեք, կանոնները թելադրում են խոշոր ցանցային սուպերմարկետները», - ասաց Վազգեն Սաֆարյանը:
