Հայաստանը միջազգային հարթակում աութսայդեր է, իշխանությունները Սերժ Սարգսյանի գլխավորությամբ ոչինչ չեն տվել երկրին վերջին 10 տարվա ընթացքում։ Ապրիլի 11-ին՝ լրագրողների հետ հանդիպման ժամանակ հայտարարել է Կենտրոնական բանկի նախկին նախագահ Բագրատ Ասատրյանը։
Նրա խոսքով՝ Հայաստանի ՀՆԱ–ն, փաստացիորեն, փոփոխություն չի կրել, արտաքին աղբյուրներից միջոցներ չեն ներգրավվել, նոր աշխատատեղեր չեն ստեղծվել։ Փոխարենն աճել է արտաքին պարտքը, որը ծախսվում է հարկատուների համար անհասկանալի ուղղությամբ. «Իշխանությունները պետք է հարկատուներին զեկույցեն, թե ուր են գնում արտաքին աղբյուրներից ստացված միջոցները։ Չպետք է մոռանանք, որ այդ պարտքերը մարելու են հաջորդ սերունդները»,–նշել է նա։
Ասատրյանի գնահատմամբ՝ խորհրդարանական կառավարման ձեւին անցնելով իշխանությանը մոտ կանգնած մարդկանց մի խումբ կփորձի մտածել՝ ինչ անել մի քիչ ավելի լավ ապագա ունենալու համար, թե չէ այս ճանապարհը տանում է քայքայման: Նրա կարծիքով՝ կարելի է առանձնացնել երկու ձեռքբերում՝ արտահանման աճը եւ ՀՀ-ԵՄ համաձայնագիրը: «Սակայն իրականությունն ավելի մռայլ է՝ ներկայիս իշխանությունները սպառել են իրենց»,–եզրափակել է Բագրատ Ասատրյանը: