Պաշտոնատար անձանց պաշտոնեական կեղծիք կատարելուն դրդելու մեջ մեղադրվող՝ Նոյեմբերյանի անտառտնտեսության տնօրեն Վասիլ Չիլինգարյանի գործն ուղարկվեց դատարան:
Ըստ մեղադրանքի, Վասիլ Չիլինգարյանը 2016թ. սեպտեմբերի 22-ից մինչև հոկտեմբերի 11-ն ընկած ժամանակահատվածում ստուգում իրականացնող բնապահպանության պետական տեսչության ստուգող խմբի պաշտոնատար անձանց խնդրելու եղանակով դրդել է պաշտոնեական կեղծիք կատարելուն, այն է՝ Չիլինգարյանը ստուգմամբ հայտնաբերված ապօրինի հատված ծառերի փաստացի ծավալներն ու պատճառված վնասի իրական չափը նվազեցնելուն, որով էական վնաս է պատճառվել պետական կազմակերպությանը և պետությանը:
Չիլինգարյանին մեղադրանք է առաջադրվել Քրեական օրենսգրքի 308-րդ հոդվածի 1-ին մասով եւ 38-314-րդ հոդվածի 1-ին մասով: Նա ստորագրությամբ ազատ է արձակվել: Գործը քննվելու է Տավուշի մարզի ընդհանուր իրավասության դատարանի Բերդի նստավայրում:
Նշենք, որ Չիլինգարյանն իրեն առաջադրված մեղադրանքը չի ընդունում: Ավելի վաղ նրա պաշտպան Տիգրան Աթանեսյանը պատմել էր, որ ամեն ինչ սկսվել է 2016թ.-ին անտառտնտեսությունում արված ստուգումների փաստաթղթերում եղած ջնջումներից:
«2016թ.-ին 31 հազար հա անտառում հայտնաբերվել է ապօրինի հատված 105 ծառ, նման արդյունքի համար մարդուն պետք է շքանշան տան, որովհետեւ մյուս անտառտնտեսություններում մի քանի հազար ապօրինի ծառ է հատվում: Դա արձանագրվել է, որից հետո պարզվել է՝ 11 ծառը հին կտրված ծառերն են եղել, որոնք արդեն իսկ արձանագրված են եղել: Չիլինգարյանը զգուշացրել է այդ մասին ստուգողներին, նրանք էլ ճիշտ չեն գրանցել, ընդամենը ջնջել են իրենց թղթերում՝ առանց համապատասխան նշումներ անելու: Այժմ Չիլինգարյանին մեղադրում են, որ դիրքը չարաշահել է եւ ազդել տեսուչների վրա, որ այդ ջնջումներն անեն»,- ասել էր նա:
