Ադրբեջանի Արտաքին գործերի նախարարությունն էստոնական կողմին որեւէ բացատրություն չի ներկայացրել Տալլինի քաղաքային խորհրդարանի նախագահի խորհրդականի եւ Էստոնիայի Կենտրոնամետ կուսակցության երիտասարդական թեւի նախագահ Կարինե Օգանեսյանի շուրջ ստեղծված իրավիճակի կապակցությամբ: Այս մասին Էստոնիա-Հայաստան վիդեոմիացման ժամանակ լրագրողներին հայտնել է Տալլինի Հայկական մշակութային միության նախագահ Ռազմիկ Իվանյանը:
Հիշեցնենք, որ Էստոնիայի քաղաքացի Կարինե Օգանեսյանը ձերբակալվել էր Բաքվի օդանավակայանում, ըստ երեւույթին՝ իր ազգության պատճառով, ինչից հետո արտաքսվել էր Էստոնիա: Այս միջադեպը տեղի էր ունեցել մարտի վերջին, երբ Օգանեսյանն էստոնական պատվիրակության կազմում պետք է մասնակցեր Ադրբեջանում կայանալիք մանկավարժական միջազգային գիտակրթական համաժողովին:
«Ադրբեջանի ԱԳՆ-ն դեռ չի պարզաբանել Էստոնիային, թե ինչու նրանք թույլ չեն տվել երկրի քաղաքացուն մասնակցել միջոցառմանը»,- հայտնել է Իվանյանը: