ՀՀ գլխավոր դատախազությունն անդրադարձել է Նիկոլ Փաշինյանի եւ նրա աջակիցների կողմից նախօրեին ԵՊՀ-ի շենք, իսկ այսօր արդեն Հանրային ռադիոյի շենք մուտք գործելու փաստին:
Դատախազության հայտարարությունում ասվում է.
«2018թ. ապրիլի 13-ին ՀՀ ոստիկանության Երեւան քաղաքի վարչությունում եւ Կենտրոնականի բաժնում ստացված ահազանգերի համաձայն՝ մուտքի դուռը վնասելով Երեւանի պետական համալսարան են ներխուժել ՀՀ Ազգային ժողովի պատգամավոր Ն.Փաշինյանի գլխավորած հավաքի մի խումբ մասնակիցներ եւ դռները վնասելով փորձել են մտնել Համալսարանի ռեկտորի աշխատասենյակ: Այդ ընթացքում հավաքի մասնակիցների կողմից մարմնական վնասվածքներ են պատճառվել Համալսարանի անվտանգության ծառայության երկու աշխատակիցների: Տեւական ժամանակ գտնվելով ԵՊՀ շենքում՝ հավաքի մասնակիցներն իրենց գործողություններով խախտել են Համալսարանի բնականոն գործունեությունը:
Իսկ 2018թ. ապրիլի 14-ին ՀՀ ոստիկանության Երեւան քաղաքի վարչության Կենտրոնականի բաժնում ստացված հաղորդման համաձայն՝ ՀՀ Ազգային ժողովի պատգամավոր Ն. Փաշինյանը հավաքի մի խումբ մասնակիցների հետ միասին, շենքի պահպանությունն իրականացնող ոստիկանության ծառայողի դիմադրությունը հաղթահարելով, մուտք են գործել պետական պահպանության ենթակա ռազմավարական օբյեկտ հանդիսացող եւ ՀՀ ոստիկանության պահպանության ներքո գտնվող «Հայաստանի հանրային ռադիո» ՓԲ ընկերության շենք:
Այդ ընթացքում հավաքի մասնակիցները, վնասելով գույքը, փակ վիճակում գտնվող դուռը կոտրելով, մտել են ընկերության սենյակներից մեկը:
Ոստիկանության ծառայողը Ն. Փաշինյանից պահանջել է հավաքի մասնակիցներին դուրս բերել շենքից եւ ազատել զավթված շենքը: Սակայն հավաքի կազմակերպիչը չի կատարել պահանջը, ինչպես նաեւ ոստիկանության ծառայողի օրինական պահանջը չի փոխանցել հավաքի մասնակիցներին՝ դրանով չկատարելով հավաքի բնականոն ընթացքն ապահովելու՝ «Հավաքների ազատության մասին» ՀՀ օրենքով սահմանված իր պարտականությունը:
Ներխուժած անձինք իրենց գործողություններով խոչընդոտել են ընկերության բնականոն գործունեությունը, իսկ Ն. Փաշինյանը, պահելով շենքը, իրեն ուղիղ եթեր տրամադրելու պահանջ է ներկայացրել:
ՀՀ գլխավոր դատախազության կողմից հանձնարարվել է ՀՀ ոստիկանությանը՝ վերը նշված երկու դեպքերի առթիվ ՀՀ քրեական դատավարության օրենսգրքի 180-181-րդ հոդվածներով նախատեսված կարգով նախապատրաստել նյութեր՝ քրեական գործ հարուցելու հիմքերի առկայությունն ստուգելու նպատակով»:
- «Ես չեմ եկել հարցազրույցի, եկել եմ ուղերձով դիմելու». Փաշինյանը բանակցում է ուղիղ եթեր մտնելու համար (Ֆոտո)
- Երթի մասնակիցները մտան Հանրային ռադիոյի շենք. Փաշինյանը ուզում է ուղիղ եթեր մտնել (Ֆոտո)
- Նիկոլ Փաշինյանը Հանրային ռադիոյի ստուդիայից ուղերձով դիմեց ժողովրդին
- Փաշինյանն իր կողմակիցների հետ լքեց Հանրային ռադիոյի շենքը. երթը շարունակվում է (ուղիղ, Ֆոտո)
- Փաշինյանի գործողությունները կարող են առաջացնել քրեական պատասխանատվություն. Ոստիկանություն
