Երեւանի Ֆրանսիայի հրապարակում հանրահավաքի ավարտից հետո հնչում է բարձր երաժշտություն, մարդիկ պարում են: Ինչպես նախորդ գիշեր, այսօր եւս վրաններ են տեղադրվել, որպեսզի ցուցարարները գիշերեն:
«Քաղաքացիական պայմանագիր» կուսակցության առաջնորդ Նիկոլ Փաշինյանի փոխանցմամբ, նախորդ գիշեր հրապարակում գիշերել է 190 մարդ, ինչը քիչ է եւ վտանգ կա, որ ոստիկանությունը կարող է ուժ կիրառել: Նա կոչ է արել այս գիշեր ավելի շատ մարդիկ մնան:
Հիշեցնենք, որ Ֆրանսիայի հրապարակը երեկվանից փակ է. մասնավորապես, փակ է Մաշտոցի պողոտա-Մոսկովյան փողոց, Բաղրամյան-Մոսկվյան փողոցների հատվածները, Թումանյան-Մաշտոցի պողոտա խաչմերուկը, Սայաթ-Նովա փողոցի հատվածը, Հյուսիսային պողոտայի հատվածը։ Երեկ հանրահավաքը Ազատության հրապարակից տեղափոխվել էր այստեղ: Ֆրանսիայի հրապարակը այժմ էլ բոլոր կողմերից շարունակում է շրջապատած մնալ նստարաններով:
Ավելի վաղ NEWS.am-ը հայտնել էր, որ «Քաղաքացիական պայմանագիր» կուսակցությունը՝ Նիկոլ Փաշինյանի գլխավորությամբ, մարտի 31-ից քայլարշավ է սկսել Հայաստանի քաղաքներով, որն ավարտվել է ապրիլի 13-ին, Ազատության հրապարակում շուրջօրյա հանրահավաքով, ապա նստացույցով Ֆրանսիայի հրապարակում: Նրանք հայտարարել են, որ մտադիր են ապրիլի 17-ին շրջափակել ԱԺ շենքը, նաեւ պատգամավորների տները եւ թույլ չտալ, որ նրանք մասնակցեն ԱԺ-ում վարչապետի ընտրությանը: «Ելք» դաշինքի մյուս երկու կուսակցությունները՝ «Լուսավոր Հայաստանը» եւ «Հանրապետությունը» չեն միացել այս պայքարին:
Հիշեցնենք, որ ապրիլի 17-ին ԱԺ հատուկ նիստում տեղի կունենա վարչապետի ընտրությունը: ՀՀԿ-ն վարչապետի թեկնածու կառաջադրի Սերժ Սարգսյանին: