Ֆիլադելֆիայի օդնավակայանում Southwest Airlines ավիաընկերության Boeing 737-700 օդանավի արտահերթ վայրէջքի ժամանակ, որը կատարում էր Նյու Յորք-Դալլաս չվերթը, մի կին է մահացել, հայտնում է NBC-ն:
Հեռուստաալիքի տեղեկություններով՝ թռիչքից 20 րոպե հետո պայթել է օդանավի շարժիչներից մեկը, որից հետո բեկորները կոտրել են իլյումինատորը, որի հետեւանքով տեղի է ունեցել ապահերմետիկացում: Օդանավի ուղեւորները պատմել են, որ կանանցից մեկին հոսանքը քաշել է իլյումինատորի մեջ, սակայն հաջողվել է նրան օդանավ վերադարձնել:
Օդանավում ընդհանուր եղել է 144 ուղեւոր եւ անձնակազմի 5 անդամ: Տեղի ունեցածի հետեւանքով մեկ մարդ մահացել է, եւս 20-ը՝ տուժել, նշել է հեռուստաալիքը:
Ֆիլադելֆիայում Southwest Airlines ավիաընկերության օդանավի շարժիչի հետ կապված խնդիրների պատճառով արտահերթ վայրէջքի մասին ապրիլի 17-ի երեկոյան հայտնել էր CNN-ը: Հեռուստաալիքի զրուցակիցները պատմել էին, որ վայրէջքից հետո ուղեւորներից մեկը հոսպիտալացվել է: