Ցուցարարները «Իմ քայլը» նախաձեռնության ղեկավար, «Քաղաքացիական պայմանագիր» կուսակցության առաջնորդ Նիկոլ Փաշինյանի գլխավորությամբ Ալեք Մանուկյան փողոցից հասել են Տիգրան Մեծի պողոտա: Այսօր, ի տարբերություն նախորդ օրերի, ցուցարարները փողոցներ չեն փակում: Երթը անցնելուց հետո փողոցները բացվում են: Մասնավորապես, երթը անցել Մաշտոցի, Կորյունի, Չարենցի, Վարդանանց, Նար-Դոսի փողոցներով:
Այս պահին բաց է նաեւ Ֆրանսիայի հրապարակը եւ Բաղրամյան պողոտան:
Փաշինյանը երթի ընթացքում բարձրախոսով կոչ է անում քաղաքացիներին դուրս գալ և միանալ իրենց շարժմանը, որ այսօր ժամը 19-ին Հանրապետության հրապարակում հանրահավաք է տեղի ունենալու: Նա կոչ արեց ոստիկաններին ազատ արձակել բերման ենթարկված անձանց, նա նաեւ տեղեկացրեց, որ Գյումրիում իրենց աջակիցները փակել են Գյումրիի հրապարակը:
Ավելի վաղ NEWS.am-ը հայտնել էր, որ «Քաղաքացիական պայմանագիր» կուսակցության առաջնորդ Նիկոլ Փաշինյանն իր աջակիցների հետ միասին ապրիլի 13-ից բողոքի ակցիաներ է իրականացնում Երեւանի փողոցներում՝ արգելափակելով փողոցներն ու հրապարակները: Նրանք բողոքում են Սերժ Սարգսյանի վարչապետ դառնալու դեմ: Բողոքի ակցիաների ընթացքում բախումներից տուժել է 46 մարդ, այդ թվում Նիկոլ Փաշինյանը: Մի քանի տասնյակ մարդիկ բերման են ենթարկվել:
Կա հարուցված քրեական գործ Հանրային ռադիո մուտք գործելու եւ Մաշտոց-Թումանյան խաչմերուկում միջադեպի փաստերով՝ ՀՀ քրեական օրենսգրքի 225-րդ հոդվածի հատկանիշներով:
Նշենք, որ ապրիլի 17-ին ԱԺ հատուկ նիստում Սերժ Սարգսյանը ՀՀ վարչապետ է ընտրվել 77 կողմ, 18 դեմ ձայներով: