Նորարարական արագընթաց Hyperloop տրանսպորտը չպետք է պարզապես տեղափոխի ուղեւորներին մի կետից մյուսը. ուղեւորությունները պետք է հնարավորինս հարմարավետ լինեն: Այս մասին NEWS.am-ի թղթակցի հետ զրույցում ասել է Hyperloop Transportation Technologies-ի (HTT) գլխավոր տնօրեն Դիրկ Ալբորնը:
Այսօր ճանապարհորդությունները եւ ուղեւորությունները շատ մարդկանց մոտ զուգորդվում են սթրեսի, բացասական զգոցղությունների եւ հոգնածության հետ: Սակայն Hyperloop կապսուլայում մարդիկ պետք է իրենց հարմարավետ զգան եւ հարկավոր է մտածել այդ հարմարավետությունն ապահովող միջոցների մասին, որպեսզի մարդիկ կարողանան վայելել ուղեւորության ժամանակ անցկացված ժամանակը, ընդգծել է գլխավոր տնօրենը: Պետք է նաեւ պայմաններ ստեղծել, որպեսզի մարդիկ կարողանան օգտակար անցկացնել իրենց ժամանակը:
Այսօր հասանելի տեխնոլոգիաները կարելի է օգտագործել ուղեւորությունների ժամանակցույցի օպտիմալացման համար՝ զբաղված մարդկանց ժամանակը տնտեսելու համար. նրանք կկարողանան հստակ իմանալ, երբ է կապսուլան ժամանելու եւ նրանք չեն կորցի իրենց ժամանակը:
Գլխավոր տնօրենի խոսքով՝ տարբեր ընկերությունները նույնպես կկարողանան առաջարկել իրենց ծառայությունները Hyperloop-ի ուղեւորներին, ինչը կնպաստի իրենց բիզնեսի զարգացմանը:
«Ընկերությունները հսկայական գումարներ են ծախսում մարքեթինգի համար՝ մարդկանց որոշակի տեղեր ներգրավելու նպատակով: Ուղեւորության ժամանակ մարդիկ արդեն ինչ-որ մի վայրում կլինեն եւ այնտեղ 20, 30, 50 րոպե կանցկացնեն, երբեմն նույնիսկ 14 ժամ եւ դա բիզնեսի համար մեծ հնարավոորւթյուններ է բացում», - նշել է Դիրք Ալբորնը:
Hyperloop Transportation Technologies ընկերությունը գլխավոր տնօրենի խոսքով այժմ ակտիվորեն աշխատում է արագընթաց Hyperloop տրանսպորտի գաղափարը կյանքի կոչելու համար: Ներկա պահին խոշորագույն ապահովագրական ընկերություններից մեկի հետ բանակցություններ են անցկացվում, ինչպես նաեւ աշխատանքներ են տարվում նոր տրանսպորտի տեսակի գործունեության օրենսդրական կարգավորման համար:
Դիրք Ալբորնը նաեւ հիշեցրել է, որ վերջերս Բրազիլիայում բացել են առաջին գլոբալ նորարարական XO Square բեռնափոխադրման կենտրոնը: Իսկ ուղեւորատար բեռնափոխադրման առաջին կոմերցիոն սարքը, ինչպես նաեւ նորարարական եւ զբոսաշրջային կենտրոնները Hyperloop Transportation Technologies-ը մտադիր է մոտ ապագայում կառուցել Աբու Դաբիի եւ Դուբայի սահմանին:
Հիշեցնենք, որ Hyperloop-ի գաղափարը պատկանում է SpaceX եւ Tesla Motors ընկերությունների հիմնադիր, գործարար եւ ներդրող Իլոն Մասկին:
Ի՞նչ է իրենից ներկայացնում Hyperloop-ը: Ուղեւորներով կամ բեռներով կապսուլաները երկրի մակերեւույթի վերեւում շարժվում են հատուկ խողովակներում՝ չափազանց նոսրացված օդի պայմաններում եւ ընդհուպ մինչեւ 1220 կմ/ժամ արագությամբ:
