Ֆրանսիայի եւ Միացյալ Նահանգների նախագահներ Էմանուել Մակրոնը եւ Դոնալդ Թրամփը կոչ են արել Իրանի հետ նոր միջուկային համաձայնագիր կնքել: Այս հայտարարությունն արվել է երկու երկրների ղեկավարների բանակցություններից հետո, հաղորդում է AFP-ն: Մինչ բանակցությունների մեկնարկը, Թրամփը Իրանի միջուկային համաձայնագիրը անվանել է «խելահեղ եւ ծիծաղելի»:
Ըստ Մակրոնի՝ «այս հարցի վերաբերյալ շատ անկեղծ քննարկումներ» տեղի ունեցան: «Ուստի, մենք ցանկանում ենք Իրանի հետ նոր գործարք մշակել»:
Թրամփի խոսքով՝ ներկայիս համաձայնագիրը «փտած հիմքեր ունի»:
«Սա վատ գործարք է, այն դատապարտված է ձախողման», - ասել է նա:
«Մենք կտեսնենք, թե ինչ կլինի մայիսի 12-ին».
Մայիսի 12-ը վերջին օրն է, որը Թրամփը սահմանել էր եվրոպական դաշնակիցների համար համաձայնագրի «ուղղման» նպատակով: Ենթադրվում է, որ ԱՄՆ-ն կարող է այդ օրը հայտարարել գործարքից դուրս գալու մասին:
Մակրոնի խոսքով՝ նոր համաձայնագիրը պետք է 3 լրացուցիչ տարր պարունակի՝ Թեհրանի բալիստիկ հրթիռների ծրագիրը, դրա ազդեցությունը Մերձավոր Արեւելքի վրա եւ այն, ինչ կարող է տեղի ունենալ 2025-ից հետո, երբ նոր համաձայնագրի համապատասխան Իրանը կկարողանա աստիճանաբար գործարկել իր միջուկային ծրագրի մի մասը:
Մեկնաբանելով միջուկային ծրագրի վերագործարկման մասին Իրանի հայտարարությունները՝ Թրամփն ասել է.
«Նրանք ոչինչ չեն վերագործարկելու, եթե անեն, մեծ խնդիրներ կունենան»:
