Կորեայի Հանրապետության նախագահ Մուն Չժե Ինը Հյուսիսային Կորեայի առաջնորդ Կիմ Չեն Ընին առաջարկել է միավորել երկու երկրների երկաթուղիները։ Այս մասին ապրիլի 27-ին ճեպազրույցի ժամանակ հայտարարել է Կորեայի Հանրապետության նախագահի ավագ մամուլի քարտուղար Յուն Յոն Չհանը, փոխանցում է ՏԱՍՍ–ը։
«Նախագահ Մունը նշել է, որ դա նշանակալի ներդրում կլինի երկու երկրների տնտեսական համագործության գործում»,–ասել է նա։
Միջկորեական երկաթուղիների միավորման նախագիծը երկու երկրների նախագահները քննարկել էին ավելի վաղ, բայց այն կյանքի չէր կոչվել։ Այն նաեւ նախատեսում է հետագայում ռուսական Տրանսսիբի հետ միավորում, որը թույլ կտա Կորեական թերակղզուց բեռներն ավելի արագ Եվրոպա հասցնել։
Կորեական երկու պետությունները նախատեսում են քննարկել Հյուսիսի եւ Հարավի հարաբերությունների բարելավումը, խաղաղությունն ու միավորման հեռանկարները։
Բանակցությունների առավոտյան ռաունդի ժամանակ Կիմ Չեն Ընը Կորեայի Հանրապետության նախագահին առաջարկել է ավելի հաճախ հանդիպումներ անցկացնել։
Բացի այդ, Սեուլը հաղորդել է Կիմ Չեն Ընի՝ Կորեական թերակղզում առճակատման պատմությանը վերջ դնելու կոչի մասին։
Մուն Չժե Ինն, իր հերթին, իր հյուսիսկորեական գործընկերոջը պատմել է կորեացիների համար սուրբ լեռ Պեկտուսանում լինելու ցանկության մասին։
Հիշեցնենք, որ ուրբաթ օրը Հարավային Կորեայի նախագահ Մուն Չժե Ինը եւ Հյուսիսային Կորեայի առաջնորդ Կիմ Չեն Ընը Փհանմունջոմ սահմանապահ կետում սկսել են ավելի քան 10 տարում առաջին բանակցությունները:
Ապրիլի 27-ին Հյուսիսային Կորեայի առաջնորդը Փհանմունջոմ սահմանապահ կետում հատել է սահմանը՝ դառնալով հյուսիսկորեացի առաջին առաջնորդը, որն այցելել է Հարավային Կորեա: