ՀՀ տրանսպորտի, կապի եւ տեղեկատվական տեխնոլոգիաների նախարարի պաշտոնակատար Վահան Մարտիրոսյանը մայիսի 3-ին շնորհավորել է լրագրողներին Մամուլի ազատության օրվա առթիվ։ Նրա կարծիքով՝ Հայաստանում մամուլը իսկապես ազատ է՝ դրա համար կառավարությունն ու խորհրդարանը արել են ամեն հնարավորը։
Հարցին, թե անակնկալ էր նախարարի պաշտոնակատարի համար իշխանությունների նկատմամբ զանգվածային դժգոհությունները, նա ասել է. «Մենք՝ բոլորս կազմում ենք այս հասարակության մասը, տեսնում ենք ե՛ւ դրականը, ե՛ւ բացասականը։ Ես կցանկանայի, որ մենք տեսնենք ոչ միայն բացասականը, քանի որ կատարվել է եւ կատարվում է շատ դրական աշխատանք։ Իմ կողմից կցանկանամ միայն նշել, որ մինչեւ վերջ կկատարեմ իմ վրա դրված աշխատանքը։ Ամեն փոփոխության պարագայում կյանքը շարունակվում է, մենք ապրում ենք Հայաստանում եւ պետք է կառուցենք մեր ապագան։ Նրա խոսքով՝ երկրում տեղի ունեցող փոփոխությունները որքանով էին բացասական կամ դրական, ցույց կտա ժամանակը։
Վահան Մարտիրոսյանը վստահ է, որ վերջին ժամանակներս Հայաստանում ձեւավորվել է այնպիսի հասարակություն եւ միջավայր, որտեղ ամեն մեկը ազատորեն արտահայտում է իր կարծիքը եւ ոչ մի ճնշման չի ենթարկվում։