HSBC բանկի Կոմիտաս մասնաճյուղի վրա զինված ավազակային հարձակում գործելու և երկու անձի սպանության մեջ մեղադրվող ոստիկանության գնդապետ Դանիել Դանիելյանը հրաժարվում է  ցուցմունք տալ: Այս մասին NEWS.am-ի հետ զրույցում ասաց Դանիել Դանիելյանի պաշտպան Արարատ Գրիգորյանը:

«Դանիել Դանիելյանը իր իրավունքից է օգտվում եւ հրաժարվում է ցուցմունք տալ»,-ասաց նա՝ նշելով, որ այս պահին նախաքննություն է ընթանում, այլ նորություններ չկան:

Հիշեցնեք, որ  HSBC բանկի Կոմիտաս մասնաճյուղի վրա զինված ավազակային հարձակում գործելու և երկու անձի սպանության կասկածանքով ձերբակալված ոստիկանության գնդապետ Դանիել Դանիելյանը ՀՀ հատուկ քննչական ծառայությունում քննվող քրեական գործով ներգրավվել է որպես մեղադրյալ:

Ավելի վաղ հայտնել էինք, որ քրեական գործ էր հարուցվել ՀՀ քրեական օրենսգրքի 175-րդ հոդվածի 3-րդ մասի 1-ին կետով, 104-րդ հոդվածի 2-րդ մասի 1-ին, 2-րդ և 8-րդ կետերով, 34-104-րդ հոդվածի 2-րդ մասի 1-ին և 2-րդ կետերով, 235-րդ հոդվածի 1-ին մասով։