Ֆրանսիայի ներքին գործերի նախարար Ժերար Կոլոնը կիրակի հայտարարել է, որ շաբաթ երեկոյան Փարիզում իրականացված ահաբեկչության պատրաստման մակարդակը պարզունակ է եղել: Այսպիսի կարծիք նա հայտնել է Փարիզում ՆԳՆ գլխավոր շենքում հրավիրված արտահերթ հավաքի ժամանակ, փոխանցում է ՏԱՍՍ-ը։
Հավաքին մասնակցել են ոստիկանության, ժանդարմերիայի ու հետախուզական ծառայության ղեկավարները, տարբեր նախարարությունների ու գերատեսչությունների ներկայացուցիչներ, նախարարի օգնականները։
Ելույթով հանդես գալով հավաքի մասնակիցների առաջ՝ Կոլոնը նշել է, որ ահաբեկիչը հարձակման համար, ըստ ամենայնի, օգտագործել է խոհանոցային դանակ ծնողների տան խոհանոցից վերցված։ Ծնողները կալանքի տակ են վերցվել, քննիչները նրանց հարցաքննում են։
Միաժամանակ, նախարարը շեշտել է, որ եթե իրավապահ մարմինները արագ դեպքի վայր չմեկնեին եւ չչեզոքացնեին հարձակվողին, զոհերը շատ ավելի շատ կլինեին։ Կոլոնը նաեւ հավելել է, որ նմանատիպ ահաբեկչություններ կարող են տեղի ունենալ Ֆրանսիայի ցանկացած հատվածում, քանի որ ահաբեկչական սպառնալիքը երկրում բարձր է։
