Եվրասիական տնտեսական միության (ԵՏՄ) եւ Չինաստանի միջեւ կնքված առեւտրա-տնտեսական համագործակցության մասին համաձայնագիրը Հայաստանի համար լուրջ մակրոտնտեսական էֆեկտ կարող է բերել։ Այդպիսի կարծիք է հայտնել տնտեսական գիտությունների դոկտոր, պրոֆեսոր Թաթուլ Մանասերյանը NEWS.аm-ի թղթակցի հետ զրույցում։
Նրա խոսքով՝ կնքված համաձայնագիրը երկար սպասված էր եւ շատ կարեւոր, որ Հայաստանը ԵՏՄ շրջանակներում ազգային մրցակցային առավելությունների իրականացման համար արտաքին շուկաներում իր տեղը գտնի, այս պարագայում՝ չինականում։
«Մենք Չինաստանի հետ համագործակցության երկու ձեւաչափ ունենք՝ երկկողմ եւ բազմակողմ՝ ԵՏՄ շրջանակներում։ Համոզված եմ, որ հարաբերությունները երկու ձեւաչափերում էլ հաջողությամբ առաջընթաց են ապրում եւ զարգացում»,-նշել է տնտեսագետը։ Նրա կարծիքով՝ ԵՏՄ-ի եւ Չինաստանի միջեւ կնքված համաձայնագիրը կխթանի հայկական ապրանքների արտահանմանը չինական շուկա, ինչպես նաեւ կներգրավվի չինական կապիտալը Հայաստանում։
Սակայն, տնտեսագետը գտնում է, որ չինական շուկա դուրս գալու համար ՀՀ-ն պետք է ավելացնի հայրենական արտադրության ծավալները պահանջարկի ձեւավորման համար, որը, իր հերթին, շղթայական ռեակցիայով կբերի աշխատատեղերի ավելացման, գործազրկության կրճատման, շատ սոցիալական խնդիրների լուծման, եւ, հետեւաբար, Հայաստանում լուրջ մակրոտնտեսական էֆեկտի։
