Երեւանի ընդհանուր իրավասության դատարանի Շենգավիթի նստավայրում «Սասնա ծռերի» գործով դատական նիստը նույնպես մեկ շաբաթով հետաձգվել է: Դատավոր Արշակ Վարդանյանը հայտնել է, որ ոստիկանության ուղեկցող գումարտակի ծանրաբեռնվածության պատճառով ամբաստանյալները դատարան չեն բերվել: Երեկ նույն պատճառաբանությամբ նիստը հետաձգելու որոշում էր կայացրել նաեւ գործի մյուս մասը վարող Արտուշ Գաբրիելյանը: Նշենք, որ 3-րդ օրն է՝ «Սասնա ծռերի» աջակիցները փակել են դատարանի մուտքերը. «Սասնա ծռերի» 11 անդամները մայիսի 16-ից դատարանի շենքում են: Ժիրայր Սեֆիլյանի եղբայրը՝ Թորոս Սեֆիլյանն էլ մեր թղթակցին ասել է, որ վարչապետի հետ երեկ հանդիպել են, իրենց խնդիրը լուծելու վերաբերյալ խոստումներ ստացել, սակայն սպասում են գործնական քայլերի: Դրանից հետո միայն կհեռանան դատարանի հարակից տարածքից:
Միաժամանակ, այսօր «Սասնա ծռերի» անդամներից Արայիկ Խանդոյանի եւ Արմեն Բիլյանի ինքնազգացողությունը վատացել է, «Շտապօգնություն» է հրավիրվել դատարանի շենք: Բժիշկը զննումից հետո հայտնել է, որ նրանց վիճակը կայուն է: Նշենք, որ Խանդոյանն ու Բիլյանը քաղբանտարկյալներին ազատ արձակելու պահանջով հացադուլ են հայտարարել:
Գլխավոր դատախազության դիմաց այսօր ի պաշտպանություն քաղբանտարկյալների իրավունքների բողոքի ակցիա է անցկացվել: Ցուցարարները, սակայն, միայն Սամվել Բաբայանի ազատ արձակման ու գլխավոր դատախազ Արթուր Դավթյանի հրաժարականի պահանջով պաստառներով են եղել: Այնուհետեւ նրանք երթով շարժվել են դեպի Վճռաբեկ դատարան: Բաբայանի աջակիցներից Անդրանիկ Թեւանյանը հայտարարել է, որ Վճռաբեկ դատարանը Սամվել Բաբայանի գործը չի ընդունում վարույթ, իսկ նրանց հետ հանդիպման եկած դատավոր Սերժիկ Ավետիսյանը ներկայացրել է Վճռաբեկի կողմից գործերի ընդունման կարգը: Թեւանյանը, սակայն, հայտարարել է, որ իրենց պահանջն է՝ հնարավորինս սեղմ ժամկետում քննել բողոքը: Ակցիայի կազմակերպիչներին դատավորի պարզաբանումը չի բավարարել, եւ Անդրանիկ Թեւանյանը հայտարարել է, որ բողոքելու են այնքան, մինչեւ կատարվի իրենց պահանջը:
Կրթության նախարարը Երեւանի թիվ 189 դպրոցում դրամահավաքի դեպք է բացահայտել: Արայիկ Հարությունյանը դպրոց է այցելել ծնողներից մեկի ահազանգով: Հավաքվածներից ոչ ոք այդպես էլ չի խոստովանել: Փոխարենը նախարարին ասել են, թե ցանկացել են իրենց երեխաների «Վերջին զանգի» կապակցությամբ փոքրիկ միջոցառում կազմակերպել, եւ գումարը հավաքել են ծաղիկների, փուչիկների եւ զանգերի համար: Մթնոլորտը թեժացել է, երբ ծնողներից մեկը հայտարարել է, թե այդ գումարից նաեւ տնօրենին պետք է բաժին հասներ: Տնօրենը զարմացել է ու հայտարարել, որ պաշտոնավարման մեկ տարվա ընթացքում նույնիսկ մեկ ծաղիկ չի ստացել:
Արմավիրում զանգվածային թունավորման դեպքով լաբորատոր հետազոտությունների առաջին արդյունքները ստացվել են. հիվանդներից վերցված բոլոր կենսաբանական նմուշներում սալմոնելոզի հարուցիչներ են հայտնաբերվել: Սննդի, շրջակա միջավայրի լվացուկների եւ ջրի հետազոտությունները դեռեւս ընթացքի մեջ են: Փաստորեն, սննդային թունավորման վարկածը հաստատվում է: Դեպքի առիթով քրեական գործ է հարուցվել: Նշենք, որ ընկերության աշխատակիցները՝ շուրջ 200 մարդ, ընդմիջմանը հավի մսով, պանրով եւ կարտոֆիլով համբուրգեր են կերել: Շուրջ մեկուկես ժամ անց նրանց մեծ մասի ինքնազգացողությունը գրեթե միաժամանակ վատացել է: Ընկերությանը սնունդ մատակարարող «Ալվինա Մելքոնյան» ձեռնարկության գործունեությունը կասեցվել է:
Առողջապահության նախարարությունն էլ հայտնում է, որ բուժօգնության դիմած 88 հիվանդներից 63-ն արդեն դուրս է գրվել, 25-ը շարունակում է ստացիոնար բուժում ստանալ: Բոլորի վիճակը թեթեւ եւ միջին ծանրության է: Հավելենք նաեւ, որ բոլոր տուժածներն Արմավիրի Արեւադաշտ գյուղի մերձակայքում խաղողագործությամբ զբաղվող «Հայաստանի հողեր» ընկերության աշխատակիցներ են. այն պատկանում է արգենտինահայ գործարար Էդուարդո Էռնեկյանին:
Կարո Փայլանի դեմ կարող է գործ հարուցվել: Թուրքիայի արդարադատության նախարարությունը թույլատրել է նրա դեմ տխրահռչակ 301-րդ հոդվածով գործ հարուցել: «Թուրք ազգին վիրավորելու» հայազգի պատգամավորին քրեական հետապնդման հայցով դատախազություն է դիմել Գիրեսունի համալսարանի նախկին ռեկտորը: Այգուն Աթթարը որպես հայցի հիմք ներկայացրել է Հայոց ցեղասպանության մասին Փայլանի հայտարարությունները: Նախարարության թույլտվությունից հետո դատախազությունը դիմել է Թուրքիայի խորհրդարանի ղեկավարությանը՝ Կարո Փայլանին անձեռնխելությունից զրկելու համար: Հիշեցնենք, որ այդ հոդվածով մեղադրանք էր առաջադրվել նաեւ Հրանտ Դինքին, ինչին հետեւեց լրագրողի սպանությունը:
Իրավապահները ոստիկանության տարբեր ստորաբաժանումներ մի քանի տասնյակ «օրենքով գողերի» եւ քրեական հեղինակությունների են բերման ենթարկել: Նրանց թվում է նաեւ Երեւանի 43-ամյա բնակիչ, նախկինում դատված Ս.Հ.-ն, ով, պարզվում է, մի քանի օր առաջ է Ուկրաինայից Հայաստան վերադարձել: Ըստ տեղեկությունների՝ իրավապահները երկու օր է՝ իսկական գրոհ են ձեռնարկել քրեական հեղինակությունների դեմ. նրանց ոստիկանություն են հրավիրել եւ հորդորել չփորձել քրեորեն պատժելի գործողություններ կատարել: Ոստիկանության այս գործողությունների պատճառների մասին ոչինչ չի հաղորդվում:
Մաշտոցի 47-ում այսօր նախագահական նստավայրի համար արտասովոր հյուրերի են ընդունել. Արմեն Սարգսյանը մի խումբ երեխաների հրավիրել էր միասին պաղպաղակ ուտելու: Նախագահին, կարծես, հաճույք է պատճառել Հայաստանի փոքրիկ քաղաքացիների հետ ժամանցը: Նա մտադիր է սա ավանդական դարձնել եւ պաղպաղակ ուտելու հրավիրել նաեւ երեխաների հանրապետության հեռավոր բնակավայրերից:
Դոլարի ու եվրոյի արժեզրկմանը միացել է նաեւ ռուբլին: Մայիսի 18-ին դոլարի փոխարժեքը կազմել է 483 դրամ, եվրոյինը՝ 569, ռուբլունը՝ 7 դրամ 76 լումա, ֆունտինը՝ 651 դրամ:
Մայիսի 19-ին հանրապետության հյուսիսային շրջաններում, 20-ին՝ շրջանների զգալի մասում սպասվում է անձրեւ եւ ամպրոպ: Օդի ջերմաստիճանը 19-ին 1-2 աստիճանով կբարձրանա, 20-21-ին՝ 3-4 աստիճանով կնվազի: Երեւանում նույնպես ժամանակ առ ժամանակ տեղումներ կլինեն: Մայրաքաղաքում գիշերը կդիտվի +12+14, ցերեկը՝ +26+28 աստիճան տաքություն: