Ընդհանուր քննարկումներ եղել են կապված ՀՅԴ-ից մարզպետերի եւ փոխնախարարների նշանակման հետ, սակայն կոնկրետ պայմանավորվածություններ չկան: Այս մասին NEWS.am-ի հետ զրույցում ասաց ՀՅԴ Գերագույն մարմնի ներկայացուցիչ Արսեն Համբարձումյանը։
«Կարծում եմ առաջիկա օրերին այդ հարցերի հետ կապված քննարկումներ կլինեն եւ ենթադրում եմ, որ նշանակումներ կլինեն»,-ասել է նա:
Հիշեցնենք, որ ՀՅԴ-ն երկու նախարարական պորտֆել է ստացել:
Դաշնակցությանը տրամադրվել է Տնտեսական զարգացման և ներդրումների, ինչպես նաև Գյուղատնտեսության նախարարությունները։ Տնտեսական զարգացման և ներդրումների նախարար է նշանակվելու Արծվիկ Մինասյանը, Գյուղատնտեսության նախարար՝ Արթուր Խաչատրյանը։
Հիշեցնենք, որ Արծվիկ Մինասյանը նախկին վարչապետ Կարեն Կարապետյանի ղեկավարած Կառավարությունում զբաղեցնում էր Բնապահպանության նախարարի, իսկ ավելի վաղ՝ Էկոնոմիկայի նախարարի պաշտոնը։ Արթուր Խաչատրյանն աշխատել է Տարածքային կառավարման և զարգացման նախարարությունում՝ որպես նախարարի տեղակալ, ապա նշանակվել էր Շիրակի մարզպետ։ ՀՅԴ-ի՝ ՀՀԿ-ի հետ կոալիցիայից դուրս գալուց հետո Խաչատրյանը մարզպետի պաշտոնից հրաժարականի դիմում էր ներկայացրել։