Արարատի մարզի դատախազությունում վերացվել է զանգվածային հավաքներին մասնակցելու պատճառով դպրոցի փոխտնօրենի կողմից աշակերտին հարվածելու դեպքի առիթով քրեական գործ հարուցելը մերժելու մասին որոշումը. քրեական գործ է հարուցվել: Այս մասին տեղեկացնում է ՀՀ գլխավոր դատախազության մամուլի ծառայությունը:
2018թ. ապրիլի 20-ին Արտաշատ քաղաքի թիվ 1 հիմնական դպրոցում նույն դպրոցի փոխտնօրեն Ն.Մ.-ն հանրապետությունում ծավալված հավաքներին եւ երթերին մասնակցելու պատճառով դպրոց չհաճախելու հետ կապված ապտակել է նույն դպրոցի 9-րդ դասարանի մի աշակերտի:
Դեպքի առիթով ոստիկանության Արտաշատի բաժնում, այնուհետեւ՝ Արարատի մարզային քննչական վարչությունում նախապատրաստվել են նյութեր, որի արդյունքում մայիսի 17-ին քննիչի կողմից որոշում է կայացվել նյութերով քրեական գործ հարուցելը մերժելու մասին: Սակայն կայացված որոշման օրինականությունը ՀՀ Արարատի մարզի դատախազի տեղակալի կողմից ստուգելու արդյունքում պարզվել է, որ նյութերը նախապատրաստվել են թերի:
Մասնավորապես՝ հիմնավորված է համարվել, որ Ն.Մ.-ն մեկ անգամ է հարվածել աշակետին: Մինչդեռ նյութերի նախապատրաստմամբ ձեռք են բերվել մեկից ավելի անգամ հարվածներ հասցնելու վերաբերյալ տվյալներ, որոնք չեն ստուգվել: Քննության առարկա չի դարձել ծնողի կողմից բացատրություն տալու ժամանակ հայտնած այն տեղեկությունը, որ Ն.Մ-ն փորձել է 2-րդ անգամ խփել, սակայն երեխան պաշտպանվել է:
Բացի այդ՝ իր տված բացատրությունում տվյալ աշակերտը նշել է, որ «ԱԳԱ» սուպերմարկետի դիմաց դպրոցի նշյալ փոխտնօրենը հարվածել է իրեն, ինքը ձեռքով պաշտպանվել է եւ հարվածը չի դիպել իրեն: Այնուհետեւ դպրոցում նա ձեռքի ափով ապտակել է իր այտին՝ ֆիզիկական ցավ պատճառելով, իսկ տնօրենի աշխատասենյակում այլ աշակերտների ներկայությամբ ցանկացել է եւս մեկ անգամ ապտակել, սակայն տնօրենը թույլ չի տվել: Ն.Մ.-ի կողմից աշակերտին երկու անգամ հարվածելու վերաբերյալ փաստական տվյալ է արձանագրվել նաեւ դատաբժշկական փարձաքննության եզրակացության «գործի հանգամանքները» բաժնում, որոնք եւս, իբրեւ Ն.Մ.-ի արարքի որակման համար կարեւոր նշանակություն ունեցող տվյալներ, քննության առարկա չեն դարձել եւ չեն ստուգվել: Միջոցառումներ չեն ձեռնարկվել նաեւ, ըստ տրված բացատրությունների՝ դեպքին առնչություն ունեցող համադասարանցիների, առանձին ծնողների ինքնությունը պարզելու եւ դեպքի կապակցությամբ նրանց հայտնի հանգամանքների շուրջ բացատրություններ ստանալու ուղղությամբ:
Նշված իրողությունների պատճառով դեպքի առիթով քրեական գործ հարուցելը մերժելու մասին որոշումը համարելով ապօրինի եւ չհիմնավորված՝ ՀՀ Արարատի մարզի դատախազի տեղակալի կողմից կայացվել է որոշում այն վերացնելու, դեպքի առիթով ՀՀ քրեական օրենսգքրի 118-րդ հոդվածով քրեական գործ հարուցելու եւ տվյալ աշակերտին տուժող ճանաչելու մասին: