Մայիսի 24-ին Ժելեզնոդորոժնիի շրջանային դատարանը վճիռ կայացրեց «Դոնսկոյ ալյանս» ՍՊԸ-ի տնօրեն Վարդան Իսրայելյանի նկատմամբ, ով զբաղվում էր «Եվրոպեյսկիյ» բնակելի թաղամասում շենքերի կառուցմամբ, փոխանցում է «Կոմսոմոլսկայա պրավդա»-ն:
Գործարարը, որի մեղքով հարյուրավոր մարդիկ մնացել են առանց բնակարանների, սակայն՝ բանկային պարտքերով, դատապարտվել է 7 տարվա ազատազրկման: Իր պատիժը նա կկրի ընդհանուր ռեժիմի գաղութում: Դատարանը պարտավորեցրել է նրան նաեւ փոխհատուցում վճարել տուժածներին:
Հիշեցնենք, որ 18 բնակելի շենքերը «Եվրոպեյսկիյ» բնակելի թաղամասում պետք է հանձնվեին դեռ երկու տարի առաջ: Սակայն, ինչպես պարզվել է, ստացված փողերը ներդրվել են ոչ միայն շինարարության մեջ, այլ յուրացվել են տարբեր եղանակներով: Արդյունքում շինարարությունը դադարեցվել էր: Այդ ժամանակահատվածում շահագործման էր հանձնվել միայն վեց բարձրահարկ շենք: Պաշտոնական վարկածի համաձայն՝ գողացվել է մոտ 3 միլիարդ ռուբլի:
Վարդան Իսրայելյանը գործարք է կնքել հետաքննության հետ՝ հույս ունենալով ավելի մեղմ պատիժ ստանա: Նրան մինչեւ տասը տարի ազատազրկում էր սպառնում: Սակայն խաբված մարդկանց խնդիրը դեռ լուծված չէ:
