Եվրոպական հանձնաժողովը (ԵՀ) Ռուսաստանին եւ Ուկրաինային «Հյուսիսային հոսք-2» նոր գազատարի շինարարության վերաբերյալ վեճին միջնորդական ծառայություններ է առաջարկել: Նպատակը 2019 թվականից հետո Ուկրաինայի տարածքով ռուսական գազի տարանցման շարունակության վերաբերյալ մանրամասն համաձայնագիր կնքելն է: Այս մասին հայտարարել է ԵՀ փոխնախագահ Մարոշ Շեւչովիչը, հաղորդում է DW-ն:
Նրա խոսքով՝ Գերմանիան ակտիվորեն աջակցում է նման եռակողմ հանդիպման համաձայնեցմանը: Արդեն մայիսի 28-ին Շեւչովիչը նախատեսում է Ռուսաստանի հետ բանակցությունների հնարավոր ամսաթիվը քննարկել: Ուկրաինան վախենում է, որ «Հյուսիսային հոսք-2»-ի շահագործումից հետո միլիարդավոր դոլարներ կկորցնի, երբ գազատարը կմիացնի Ռուսաստանին եւ Գերմանիային:
Մարոշ Շեւովիչը խոստովանել է, որ ԵՀ-ն գործիքներ չունի «Հյուսիսային հոսք-2» նախագծի դադարեցման համար: Միեւնույն ժամանակ, նա ասել է, որ Եվրոպական հանձնաժողովը գազային դիրեկտիվի շրջանակներում մտադիր է պարզաբանել, որ նման խողովակաշարերը գտնվում են ԵՄ իրավասության տակ: Այս դիրեկտիվը արդեն հունիսին կարող է ընդունվել Եվրամիության էներգետիկայի նախարարների կողմից, ասել է Եվրահանձնաժողովի փոխնախագահը: