Հայաստանի նախագահ Արմեն Սարգսյանը, վարչապետ Նիկոլ Փաշինյանը, Արցախի նախագահ Բակո Սահակյանը, Ամենայն հայոց կաթողիկոս Գարեգին երկրորդը Սարդարապատում ծանոթացել են ռազմական տեխնիկայի նմուշներին։
Հիշեցնենք, որ Սարդարապատում անցկացվում է «Հաղթական դար» հանդիսավոր միջոցառումը, որը նվիրված է Առաջին Հանրապետության 100-ամյակին ու Սարդարապատի ճակատամարտին, որտեղ հայկական զորքերը հետ են մղել թուրք նվաճողներին։
Միջոցառման մասնակիցներին ներկայացվել է ռազմական տեխնիկա, որը եղել է Հայաստանի սպառազինության մեջ անցած 100 տարիների տարբեր ժամանակահատվածներում, 1918 թ․ պատմական իրադարձություններից սկսած մինչեւ մեր օրերը։ Գնդացիրներ ու առաջին համաշխարհային պատերազմի եւ Առաջին Հանրապետության ժամանակաշրջանի զինատեսակներ։
Տ-34 տանկը, ինքնագնա հրետանային սարքավորումներ, «Կատյուշան» Հայրենական մեծ պատերազմի մասնակիցներն են եղել։ Կողքին ժամանակակից զինատեսակներ են՝ «Տոչկա-Ու», «Կորնետ», «Կոնկուրս» , ՌԴ-ում միջազգային մրցույթի ժամանակ շահած «Տ-90» տանկը, ամենաժամանակակից զինատեսակներից մեկը՝ «Սմերչ»։ Նաեւ ներկայացված են հայրենական սպառազինման նմուշներ, այդ թվում կրակի կառավարման ավտոմատ համակարգեր, սակրավորների տեխնիկա, կապի միջոցներ, թիկունքային ապահովում։ Հանդիսավոր մասից հետո կկայանա շքերթ՝ Հայաստանի ԶՈՒ-երի, ԱԱԾ սահմանային ծառայության, Ոստիկանության, ԱԻՆ-ի ստորաբաժանումների մասնակցությամբ։ Սարդարապատի շքերթին առաջին անգամ մասնակցում են ռուսական 102-րդ ռազմակայանի զինծառայողները։
Նշենք, որ ուղիղ 100 տարի առաջ, 1918թ. մայիսին Ղարաքիլիսայում, Բաշ-Ապարանում եւ Սարդարապատում հայկական կանոնավոր ուժերին եւ կամավորականներին հաջողվեց կենաց եւ մահու ճակատամարտերում փայլուն եւ անհավանական հաղթանակ տանել թուրք հրոսակների դեմ` կասեցնելով նրանց առաջխաղացումը, որի արդյունքում Հայոց ազգային խորհուրդը Թիֆլիսում հռչակեց Հայաստանի անկախությունը:
Հայաստանի առաջին հանրապետությունը կարճ կյանք ունեցավ,1920թ. դեկտեմբերի 2-ին Հայաստանը խորհրդայնացավ:
1992թ.-ից մայիսի 28-ը պաշտոնապես նշվում է որպես Հանրապետության օր: