Ես նման ինֆորմացիա չունեմ, որ պետք է հետաձգվի։ Այսպես արձագանքեց ԿԲ նախագահ Արթուր Ջավադյանը լրագրողների հարցին, թե արդյոք տեղյակ է, որ սոցապ նախարարը կառավարություն է ներկայացրել կուտակային կենսաթոշակային համակարգի պարտադիր բաղադրիչի մեկ տարի հետաձգման մասին որոշման նախագիծ։
«Այդ քաղաքականության կրողը մենք չենք, կառավարությունն է, մենք ընդամենը զբաղվում ենք ֆինանսական շուկաների վերահսկողությամբ եւ կարգավորմամբ։ Դեռ գործում է այն օրենքը, որը գործում է։ Համաձայն գործող օրենքի՝ հուլիսի 1-ից անցնելու ենք կենսաթոշակային պարտադիր կուտակման բաղադրիչի վերջնական ներմուծմանը։ Այս պահին համակարգը գրեթե 200 հազար մասնակից ունի, եւ այս տարի պարտադիրի ներմուծման հաշվին ևս 80-81 հազար մասնակից կավելանա»,– ասաց Ջավադյանը, ընդգծելով, որ դրա հետաձգման համար անհրաժեշտ է օրենքում փոփոխություններ կատարել։
