Լրագրող Արկադի Բաբչենկոն մահափորձի արդյունքում մահացել է: Ինչպես հաղորդում է «Ուկրաինսկայա պրավդան», անհայտ անձինք կրակել են ռուս լրագրող Արկադի Բաբչենկոյի մեջքին Կիեւի իր տանը: Ստացված վնասվածքներից նա շտապ օգնության մեքենայում մահացել է:
Ազգային ոստիկանության ներկայացուցիչ Յարոսլավ Տրակալոյի խոսքով՝ դեպքը տեղի է ունեցել Դնեպրի շրջանում:
«Կինը լոգարանում է եղել: Ձայներ է լսել, դուրս եկել եւ ամուսնուն արյան մեջ տեսել: Շտապ օգնություն է կանչել, նրան տարել են, շտապ օգնության մեքենայում նա մահացել է: Տեղում աշխատում է քննչական օպերատիվ խումբը, ղեկավարությունը պարզում է հանգամանքները», - պատմել է Տրակալոն:
Արկադի Բաբչենկոն ռուս լրագրող է, նախկինում որպես ռազմական թղթակից է աշխատել: Ապրում էր Մոսկվայում, մինչ այդ բնակվում էր Պրահայում, իսկ ավելի ուշ տեղափոխվել էր Ուկրաինա:
Կիեւի ոստիկանությունը նշում է, որ որպես հիմնական վարկած է դիտարկվում Բաբչենկոյի մասնագիտական գործունեությունը, ինչպես նաեւ նրա «քաղաքացիական դիրքորոշումը», հաղորդում է Meduza-ն:
2017 թվականից Բաբչենկոն ապրել է Կիեւում եւ աշխատել ուկրաինական ալիքներից մեկում: Ռուսաստանից նա հեռացել է իր հասցեին հնչած սպառնալիքների պատճառով: Արեւելյան Ուկրաինայում հակամարտության սկսվելուց հետո Բաբչենկոն հետեւողականորեն քննադատում էր ռուսական իշխանություններին եւ մեղադրում ագրեսիվ պատերազմ սկսելու համար: